विक्रम संवत्यात गुबले विस्थापित यायेगु ?
विक्रम संवत् भारतीय संवत् ख:, व नं भारतया उत्तरया भागय् जक न्ह्यानाच्वंगु संवत् ख: धका: स्यूगु हे खँ जुल । नेपाल संवत् राष्टि्रय संवत् ख: धका: सरकारी स्तरं हे मान्यता बी धुंका: ला थ्व सवाल थ्व विषय स्पष्टरुपं हे चर्चाय् वल, वा थौंकन्हय्या भासं 'इश्यू' जुल । आ: थ्व विक्रम संवत् धइगु विदेशी संवत् ख: धइगु स्पष्ट जुइक जुइक नं थुकियात नेपा:या सरकारं छाय् घानातयेगु धइगु सवाल आ: पिदनाच्वंगु दु । नेपाल संवत् राष्टि्रय संवत्, सरकारं मान्यता बी हे मा:, धइगु नारा न्हापांखुसी थ्व:गु व थुगु संवत्यात राष्टि्रय संवत् ख: धका: भाषा आन्दोलनया मनूतसें न्ह्यथंगु इलय् थुकियात नेवा:तय्गु दथुइ जक चले जूगु नेवा: संवत् जक ख: धइगु ल्याखं खूब बहस व आक्रमण जूगु ख: । थुगु सम्बन्धय् छम्ह पन्त भाजुं ला विरोधय् पिथंगु च्वसु मुंका: सफू तकं पिथंगु ख: । तर नेपा:या राष्टि्रयताप्रति सचेत नेवा:तसें सतकय् सांस्कृतिक जुलुस पिथंगु इलय् जक थुगु नारा थ्वयेकूगु मखुसें न्हूदँया इलय् हे जक जूसां दँय्दसं हे थ्व नेपाल सम्वत्यात राष्टि्रय संवत् धका: अनुसन्धान मुलुक च्वसुत पिथन । थुकिं याना: नं नेपाल संवत्यात नेवा:तय्गु जक संवतय् सीमित याये चाहे जूपिं ल्यूने लाना: सुम्क च्वनेमाल । वयांल्यू नं न्हूदँया दबुली व:पिं गुलिखे राजनीतिक नेतातसें नं थुकियात नेवा:तय्गु हे जक संवत् ख: धका: तायेका: सकलें जातजाति व भाषाभाषीयात मान्यता दयेमा: धइगु ल्याखं न्ववाना: वन । तर थ्वहे इलय् नेपाल संवत् धइगु नेवा:तय्गु जक संवत् मखु, थ्व नेपा: राष्ट्रया हे संवत् ख:, चन्द्र शम्शेरं १९६४ सालं विक्रम संवत् नाला मका:तले थ्वहे संवत् राष्टि्रय स्तरय् नं प्रचलित जुयावयाच्वंगु संवत् ख: धइगु खँ नं वहे दबुलिं प्रचारय् वन । थथे हे जुया: न्हापां शंखधर साख्वा: राष्टि्रय विभूति घोषित जुल, अनंलि सञ्चार माध्यमय् थुकियात छ्यलेगु ज्या जुल व अन्तत: नेपाल संवत् राष्टि्रय संवत् धका: नं घोषित जुल । नेपाल संवत्यात सरकारं राष्टि्रय संवत् धका: घोषित यासेंलि थुकियात व्यावहारिक रुपं छ्यलेगु नं सवाल पिदन, अले थुकियात छ्यलेगु नितिं हे धका: व्यावहारिक पहलं क्यालेण्डर व नगुमा नं पिदन । तर निजी व जनस्तरं थुकथं जूसां सरकारी स्तरं छुं मजुया: पात ।
आ: नेपाल संवत्यात व्यावहारिक रुपं छ्यलेगु ख:सा विक्रम संवत्यात तयातयेमा:गु छुं आवश्यकता मदु । सरकारी कामकाजया रुपं र्इस्वी सन्यात छ्यलेगु व आन्तरिक रुपं नेपाल संवत्यात नं नापनापं छ्यलेगु आ:या आवश्यकता ख: । थ्व परिस्थितिइ विक्रम संवत्या गुगुं आवश्यकता मन्त । अले थ्वहे अवस्था थ्यंबलय् पुलांगु बम्हर्ूवादी सत्ताया ज:ख: च्वना: थ:गु खँ लागु याका: नयाच्वंपिन्त महील, इपिं हाला हल व सरकार न्ह्या: वने मफुत । थ्व खँयात तछ्याना: न्ह्यायेमा:गु जरुरत दयाच्वंगु दु । विक्रम संवत् नेपाल संवत्यात छ्यला: न्ह्यायेत छगू पंग: जुयाच्वंगु दु । उकिं विक्रम संवत्यात गुबले विस्थापित यायेगु धइगु सवाल आ: पिदने धुंकूगु दु ।
News Location:
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
