नेपाल संवत् राष्टि्रय संवत् जुइधुंका: झीगु आन्दोलन गुखे ?
नेपाल संवत्यात राष्टि्रय संवत्या घोषणा याये धुंका: नेपाल संवत्या आन्दोलनया माग पूवन व आ: झीसं न्हूदँ हनेगु व नख: न्यायेकीगु ल्याखं जक न्हूदँया सांस्कृतिक जुलुस पिथनीगु ख: ला ? थथे मखु, थुकियात राष्टि्रय संवत्या मान्यता जूकथं थुकियात थुकिया छ्यलाबुलाय् नं हयेगु नितिं झीसं आन्दोलन यायेमा:गु ला दहे दनि । तर न्हूदँया इलय् व न्हूदँया दबुलिं जक थ्व माग याना: ज्या पूवनी मखु । थुकिया नितिं संवत् सम्बन्धी आयोग वा समिति दयेका: न्ह्यायेगु बचन उबलय्या प्रधानमन्त्री प्रचण्ड व माधवकुमार नेपाल निम्हेस्यां हे बी धुंकूगु ख: । तर आ:तक नं कार्यान्वयन मजूनि । नेपाल संवत्यात व्यावहारिक रुपं छ्यलेगु नितिं धका: परम्परागत रुपं तिथि जक मखु, वहे तिथि टूट व निन्हु क्यनेगु मयासं १ निसें ३० तकया ल्याखं न्ह्याइगु क्यालेण्डर व म्हिचापात्रो नं पिदने धुंकूगु दु, तर उकियात आ:तक नं सरकारी वा गुगुं आधिकारिक निकायपाखें 'लालमोहर' बीगु ज्या नं मजूनि । थ्व वास्तवय् विडम्वनापूर्ण ज्या ख: । अथे जूगुलिं संवत्सम्बन्धी आयोग तत्काल गठन याना: ज्या न्ह्याकेमा:गु थ्व र्इ ख: । तर न्हूदँ हनेगु ज्याझ्व:या ग्वसा: ग्वयेगु खँय् हे अलमल व कचिंग: चायेकं मचायेकं पिदनाच्वंगुलिं झीपिं कमजोर जुयाच्वंगु दु । मेगु दु:खद् खँ थ्व नं दु कि शंखधर साख्वा:यात राष्टि्रय विभूति धका: घोषणा याये धुंकूगु व:दँ मछि दये धुंकल, तर अझ नं झीके वय्क:या आधिकारिक जीवनी मदुनि । शंखधर मरु इलाछेँ त्वालय्या छम्ह बंजा: ख: धका: धयाच्वंगु दु । देय्वासीपिन्त ऋण मुक्त याना: संवत् स्थापना या:गु ला ख हे खत । तर गुलि नं खँ दु, उकी आलोचना व प्रतिवाद नं पिहाँ वयाच्वंगु दु । थुपिं सकतांयात खण्डन यायेत बौद्धिक बहस जक मखु, वैज्ञानिक अनुसन्धान नं जुइमाल, अले आधिकारिक रुपं तथ्य सत्य पित हये माल । आ:तक गुलि नं जुल, व व्यक्तिगत रुपं जुल, तर आ:तक नं आधिकारिक स्तरं छुं ज्या मजू । सवाल अनुसन्धानया नितिं सरकारी बजेटया जक मखु, आधिकारिक मान्यताया नं खँ ख: । थुपिं सकतां कार्यभार दहे दु धा:सा थुकियात कार्यान्वयनय् हयेत न्ह्यचिलेमाल व आन्दोलन नं न्ह्याके माल ।
News Location:
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
