सेनाया कुसा क्वय् माधव सरकार

दिलिप शाही 'शान्तियज्जु’

नेपाःया सामान्य ज्ञान धइगु सफुली आः थप न्ह्यसः वइगु जुइ गुगु थथे जुइफु 'निगू निगू थासं चुनाव बुनाः नं प्रधानमन्त्री जुइत ताःलाःम्ह नेपाःया प्रधानमन्त्री सु ?' वा 'गणतन्त्र नेपाःया निम्हम्ह प्रधानमन्त्री ग्वःगू थासं चुनाव बूम्ह खः ?' वास्तवय् जुइमाःगु न्ह्यसः मेगु हे खः तर सत्ताया लालसा व आशक्तिं यानाः थौं देशय् जनतां अस्वीकृत याःम्ह व्यक्ति प्रधानमन्त्री पदय् थ्यंगु दु । व नं छगू जक थासं मखु निगू निगू थासं संविधानसभा चुनावय् पराजित जूम्ह व्यक्ति माधव नेपाल राष्ट्रया प्रधानमन्त्री जूगु दुसा जनतां बिउगु अभिमतयात नं वर्तमान राजनीतिक पार्टीतय्सं उल्लंघन याःगु स्पष्ट जूगु दु ।

इतिहासया उगु पानाय् च्वय् न्ह्यथनागु न्ह्यसलं वर्तमान प्रधानमन्त्रीयात गुलि स्वर्गीय आनन्द वइगु खः व ला धायेफुगु अवस्था मदु तर वय्कःया लिपांगु पिंढीयात धाःसा थ्वहे न्ह्यसलं लित्तुमतु लीगु जकं मखु ला वय्कःया वंशजं वास्तवय् थः पुर्खा प्रधानमन्त्री धकाः गर्व याये न्ह्यः सामान्य ज्ञानया सफुली थप जूगु न्ह्यसःयात छकः लुमंकीगु खः ।

राजनीतिइ नं थःगु हे कथंया मूल्य व मान्यता दु धाइ । अले राजनीतिक राजनीतिक मूल्य मान्यता मंत धाःसा व राजनीति जुइ फइ मखु । नेपालय् ताः ई न्ह्यवंनिसें थनया प्रमुख राजनीतिक पार्टी धाःपिंसं थःगु राजनीतिक आस्थायात बह्रः तःगुलिं हे नेपालय् प्रजातान्त्रिक व्यवस्था सफल जुइ मफुगु खः । तर थौं थ्व खँ फुक्कं छखे लिकाः जनतां अस्वीकृत व्यक्तियात प्रधानमन्त्री दयेकेगु गुगु ज्या जुल थुकिं धाःसा हाकनं छकः नेपाःया राजनीतिक स्थितियात ध्याचलं छ्वाकेगु ज्या जूगु दु ।

थौंया विश्व राजनीतिइ नेपाः विश्वया केन्द्रय् लानाच्वंगु दु । थुकिया मू कारण धइगु माओवादीं न्ह्याकूगु झिदँया जनयुद्ध लिपा हाकनं माओवादी शान्तिपूर्ण राजनीतिक प्रकि्रयाय् वःगु जक मखु संविधानसभाया चुनाव मार्फत बहुमत हयाः थःगु सरकार तकं स्वनेत ताःलाःगुलिं खः ।

लोकतान्त्रिक विधि व मूल्य मान्यताय् जनताया निर्णय सर्वोपरी जुइ । जनतां गज्याःगु निर्णय बिल वहे निर्णायक खः । तर नेपाःया राजनीतिइ धाःसा जनता स्वयां नं पार्टीया नेता वा छुं छुं व्यक्तिया खँ हे निर्णायक जुयाच्वंगु दु । थुकिया लिपांगु दसि खः नेपाःया वर्तमान राजनीतिक घटनाक्रम । थौं वयाः जनतां चाहे मजूसां नं माधव नेपालयात देय्या प्रधानमन्त्री कथं नालेत बाध्य जूगु दु । तर छम्ह देय्या प्रधानमन्त्री प्रति जनतायाके गुलि हार्दिकता दयेमाःगु खः व धाःसा जनतायाके खने मदु । अले थथे छाय् जुल न्ह्यसःया लिसः बीत राजनीतिक पार्टीत तयार मदु । अथे धइगु सत्तारोहण याःगु राजनीतिक पार्टीतय्के अझ नं सामन्ती मानसिकता हावी जुयाच्वंगु दनि ।

खय्त ला नेपाली कांग्रेसया लिसें एमालें नं विधिया शासन धायेगु यानाच्वंगु दु । तर थौंया राजनीतिक घटनाक्रमयात स्वयेगु खःसा थन विधिया मखु व्यक्तिया शासन हावी जुयाच्वंगु दु ।

थ्वहे झ्वलय् माओवादीया नेतृत्वय् दुगु सरकारं कारवाही याःम्ह प्रधानसेनापति रुक्मांगद कटवालयात वर्तमान सरकारं यथापदय् कायम यायेगु निर्णय याःगु दु । अले थ्व निर्णय नं थज्याःगु इलय् पिहां वःगु दु गुगु इलय् प्रधानसेनापति रुक्मांगद कटवालं सर्वोच्च अदालतं बिउगु आदेशयात उल्लंघन यानाच्वंगु समाचार वयाच्वंगु दु । सर्वोच्चया आदेशयात तकं बारम्बार उल्लंघन यानाच्वंम्ह व्यक्तियात हाकनं प्रधानसेनापति पदय् निरन्तरता बीगु धइगु सैनिक अधिनायकवादय् थःपिं नं दु धकाः प्रमाणित यायेत स्वःगु जकं मखुला थौं न्ह्यसः दनाच्वंगु दु ।

माओवादीं सरकारया निर्णययात पालना मयाः धकाः जक प्रधानसेनापतियात कारवाही याःगु खः । तर थौं वयाः सरकारया निर्णय जक मखु कटवालं ला सर्वोच्च अदालतया निर्णययात तकं उल्लंघन यानाच्वंगु दु । अले थज्याःम्ह व्यक्तियात हाकनं प्रधानसेनापति पदय् निरन्तरता बीगु धकाः राजनीतिक पार्टी लगायत २२ दलं छु खँ साबित यायेत्यंगु खः थौं न्ह्यसः दनाच्वंगु दु । अले थुकथं राजनीतिक पार्टीया नेतात सरकारया छगू मन्त्रालय अन्तर्गतया छम्ह कर्मचारीयात बचे यायेत थुकथं छाय् ब्वाँय् जुयाच्वन धइगु न्ह्यसः नं थन ब्वलनाच्वंगु दु । थुकिया लिउने छु रहश्य दु धइगु खँ थौं हरेक सचेत जनताया दुने ब्वलनाच्वंगु दु ।

कटवालं थौं सर्वोच्चया निर्णय माने मयात कन्हय् हाकनं सरकारया मेगु निर्णय नं माने मयाइगु अवस्था वल धाःसा आः सेनापतिया लिउ लिउ ब्वाँय् वनाच्वंगु राजनीतिक पार्टीतय् हालत गज्याःगु जुइ सायद थुखेपाखे राजनीतिक पार्टीतय्सं सोचे याःगु मदुनि । मेता खँ धइगु आः सरकार गठन यायेगु निंतिं सक्रिय जुयाच्वंपिं राजनीतिक पार्टीतय्सं कटवालयात कटवाल छम्ह थनातःम्ह बुख्याःचा जक खः धइगु खँ थुइकाच्वंगु खःसा थ्व दकलय् तःधंगु भूल जुइफु । थौं सर्वोच्च अदालतयात टेरे मयाःम्ह कटवालं कन्हय् वयाः माधव नेपाल व गिरिजाप्रसाद कोइरालायात थःगु स्वार्थ अनुकूल मजुल धाःसा टेरे मयायेत बेर मदु । थुकिया प्रमाण धइगु रक्षामन्त्रीया पदभार ग्रहण यायेगु झ्वलय् प्रधानसेनापितं क्यनेधुंकूगु दु । उगु इलय् नं सेनापितं
रक्षामन्त्रीयात मन्त्रीया कथं मखुसें थः हे समकक्षी मनूयात थें व्यवहार याःगु जक मखु सरकारया प्रोटकल तकं हाचां गाःगु खँ पिहां वयाच्वंगु दु । थौं रक्षा मन्त्रीयात मचायात थें व्यवहार याइम्ह सेनापितं कन्हय् गज्याःगु व्यवहार याइगु खः व धाःसा स्वये ल्यं हे दनि । थ्व धुंकाः नं वर्तमान राजनीतिक पार्टीतय्सं प्रधानसेनापति पाछाया जुइगु खःसा धायेगु छुं मदु । तर राजनीतिक पार्टीत होशियार थौं माओवादी थेंज्याःगु शक्तिशाली पार्टीयात टेरे मयाःम्ह सेनापति कटवालं कन्हय् कांग्रेसया एमालेया छु हालत याइगु खः व स्वये ल्यं हे दनि ।

More Stories Like this