देय्या नामं स्वनात:गु छगू जक संवत् !
विश्वया इतिहासय् आपालं नगर–राज्यत वल, वन । अनंलि तत:धंगु साम्राज्य नं खडा जुल, ध्वस्त जुल । तर एेतिहासिक कालंनिसें निरन्तर अस्तित्वमान जुया वयाच्वंगु छुं देय्त मध्ये नेपा: नं ख: । थ्व देय् गथे अस्तित्वमान जुया वयाच्वन, उकियात हे ल्वयेक भाषा, साहित्य, कला, संस्कृति व लिपि जक मखु, संवत् नं अस्तित्वय् व:गु खनेदु । ध्वाँय्या खँ ला धाये हे म्वा:ल । थुकथं हे देय्या हे नामं संवत् दुगु देय् धइगु नेपा: हे जक खनेदु । थुगु संवत् अस्तित्वय् वल धइगु खँय् नं रोचक व प्रेरणास्पद खँ छु, गुगु आ:तकया दुने आपा:सिनं सीधुंकूगु नं दु ।
संवत् धइगु थौंकन्हय् तिथिमिति ला यात क:घाइगु दँ विशेषया गिन्तीया ल्याखं कायेगु व थुइकेगु यानाच्वंगु दु, तर खँ अथे मखु, थ्व ला न्हापा विशेष कीर्ति स्थापना जूगु व विशेष घटना जूगु गुलि दत धका: ल्या: तयेगु छगू कीर्तिस्तम्भ थें ख:, गुकी दच्छि पूवन धायेवं छध्व: कीगु याइ ।
गथे कि इस्वी सन् इसा मसीह जन्म जूगु घटनाया ल्या: तयेत स्थापना जुयाच्वंगु खनेदु धा:सा मुस्मांतय्गु हिजरी सन् मोहम्मद मक्कां मदीनाय् बिस्युं वंगु घटनाया स्मरण याना: लुमंकात:गु दँ ल्या: ख: । मखुसा झीके गथे ७ न्हुया नां आइतवा:, सोमवा:, धइथें न्हिया ल्या: पारु, दुतिया धइथें लाया नां कछला, थिंला धइथें ६० दँया ल्या: नं प्रभव, विभव धका: दु । उगु जमानाय् राजा महाराजापिसं तत:धंगु युद्ध त्याका: उकियात लुमंकेत नं संवत् स्थापना याना थुलि दँ दत धका: लुमंकेबीगु यात, मेखे धार्मिक ख्य:या धर्मगुरुतसें उकथं हे धर्म संस्थापकया जन्म वा विशेष घटनायात संवत् दयेकल । तर सर्वसाधारण छु यायेगु ? थ्व सम्बन्धय् धर्म सिन्धु धइगु सफुती संवत् स्थापना याये चाहे जूम्हेस्यां उगु देय्या फुक्कं जनतायात ऋण मुक्त यायेमा: धका: धयात:गु दु । थ्वहे ल्याखं शंखधर साख्वा: नं नेपा:या उबलय्या जनतायात ऋण मुक्त याना: नेपाल देय्या नामं संवत् स्थापना यात । थुकथं संवत् स्थापना भारतपाखें नं जूगु दयेमा:, तर छपुच:सिनं जक अंगिकार या:गुलिं न्हनावन खइ । तर थ्व संवत् जुजुया स्वीकृति का:गु, पशुपतिनाथ द्य:याथाय् छा:गु व देसया नामं हे स्थापना जुया: राज्य स्तरय् प्रचलनय् वये धुंकूगु जूगुलिं आधुनिक जागरणया इलय् थ्यंक नं प्रचलनय् वयाच्वन, व राज्यस्तरं न्हंकेत स्व:सां जनतां थुकियात हाकनं ल्ह्वना: राष्टि्रय मान्यता बीकां त्व:तल । थुकथं छम्ह शंखधर धइम्ह बन्जना: नं चले या:गु जूसां वयागु उगु र्इया देशभक्ति व जनभक्तिया हुनिं थ्व संवतं थ्व दँमछि लिपा नं नेपा: देय्या राष्टि्रय संवत् धका: थौंकन्हय्या पहलं हे मान्यता काये फत । थुकि मय:पिं व महीपिं दुसां हाथ्या धा:सा सुनां नं बी मफुत । जय नेपाल संवत् ।
News Location:
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
