बिपा सम्झौता पक्षय् उपराष्ट्रपति,कांग्रेस व राप्रपा
येँ (सन्ध्या टाइम्स)/उपराष्ट्रपति परमानन्द झा लगायत नेपाली कांग्रेस व राष्ट्रिय प्रजातन्त्र पार्टी नेपाः-भारत दथुइ जूगु द्विपक्षीय लगानी प्रबर्द्धन तथा सुरक्षा सम्बन्धी सम्झौता (बिपा)या पक्षय् दंगु दु। उपराष्ट्रपति परमानन्द झां बिपा सम्झौता विरोधया निंतिं विरोध जक खः धकाः टिप्पणी यानादीगु दु ।
स्वन्तिया झ्वलय् थौं सुथय् रिपोर्टर्स क्लबया ग्वसालय् देउसी भैलो ज्याझ्वलय् संचारकर्मीलिसे खँल्हासें उपराष्ट्रपति झां थ्व बिचाः प्वंकादीगु खः। वय्कलं विदेशी लगानी स्वदेशय् दुकायेगु निंतिं बिपा सम्झौता आवश्यकता दु धयादिल। वय्कलं बिपां नेपाःमितय्त संयम जुइत बाध्य याना बी धासें संयमता मकाइपिंसं जक उकिया विरोध यानाच्वंगु द्वपं नं बियादिल ।
अथे हे नेपाली कांग्रेसया छुं नेतातय्सं बिपा सम्झांताया विरोध यानाच्वंगु इलय् कांग्रेसया सभापति सुशील कोइरालां न्हापांखुसी उगु सम्झौता बारे न्ववासें थःपिं उगु सम्झौताया पक्षय् दु धयादीगु दु। वय्कलं कांग्रेस खुल्ला अर्थतन्त्रया पक्षय् दु धासें धयादिल, 'कांग्रेस सिद्धान्ततः बिपाया पक्षय् हे दु तर प्रधानमन्त्री डा. बाबुराम भट्टराई सम्झौता यायेत धाःसा भचा हथाय् चायादिल।' शान्ति व संविधान स्थायी जुल धाःसा स्वतः विदेशी लगानी वइगु खँ नं वय्कलं धयादिल ।
अथे हे राष्ट्रिय प्रजातन्त्र पार्टीया अध्यक्ष पशुपति शमशेर राणां नं बिपाया विरोध जडसुत्रवादी सोचया उपज खः धयादीगु दु। माओवादीं आःया अवस्थाय् जडसुत्रवादी सोच त्वःताः चीनं ज्वःगु लँपु नालेमाःगु सुझाव नं वय्कलं बियादिल। अध्यक्ष राणां बिपा सम्झौता बांलाःगु सम्झौता खः धासें चीनं विदेशी लगानी दुकायेगु निंतिं गुकथं रणनीति म्हितल अथे हे माओवादी न्ह्याः वनेमाः धयादिल ।
बिपा सम्झौता जुइवं हे विदेशी लगानी दुहां वइ मखु धासें लिपा वनाः देय्या नितिं फाइदा हे जुइगु विश्वास प्वंकादिल। शान्ति व संविधानया ज्या पूमवनाच्वंगु अवस्थाय् बिपाया कलह पिकयाः प्रभावित यायेगु षडयन्त्र जुयाच्वंगु दु धासें वय्कलं आः शान्ति व संविधान बाहेक छुं नं कथंया ज्याय् न्ह्याः वने मजिउगु खँ नं धयादिल ।
