बिपा बारे पिने न्ववाये दइ मखु: माओवादी
येँ (सन्ध्या टाइम्स)/एकीकृत माओवादीया थौं सुथय् च्वंगु स्थायी समितिया बैठकं आवंलि केन्द्रीय कमिटीया बैठक मजूतले नेतातय्त बिपा सम्झौतायात कयाः न्वंवायेगुलिइ छगू कथं प्रतिबन्ध तयाः बिउगु दु ।
वइगु १७ गते केन्द्रीय कमिटीया बैठक जूवनाच्वंगुलिं आःयात सार्वजनिक रुपं अभिब्यक्ति मबिइगु खँय् माओवादीया बरिष्ठ उपाध्यक्ष मोहन बैद्य किरण पक्षधर नेतात तकं सहमति जूगु दु। बिपा सम्झौतायात कयाः बैद्य पक्षया नेता व कार्यकर्तात सतकय् हे क्वहां वयाः प्रदर्शन यायेगु नाप नापं सार्वजनिक रुपं पार्टीया अध्यक्ष प्रचण्ड व प्रधानमन्त्री नामं पार्टीया उपाध्यष डा. बाबुराम भट्टराईया तकसं आलोचना यानाः थीथी कथंया द्वपं तकं बियाः वयाच्वंगु खः ।
बिपा सम्झौतायात कयाः पार्टी दुने तटस्थ रुपं च्वनाः छुं नं लाईनय् वनाः मच्वंपिं अमिक शेरचन, लिलामणि पोखरेलपिन्सं तकं बैठकय् विरोध याःगुलिं प्रधानमन्त्री भट्टराईयात तसकं ज्यामछिंगु अवस्थाय् लाःगु दु धकाः माओवादीया छम्ह नेतां धयादीगु दु। १७ गतेनिसें न्ह्याइगु केन्द्रीय कमिटीया बैठकय् कन्टेनरयात ताःचा लःल्हाःगु प्रकरण व बिपा सम्झौतायात कयाः सहलह जुइ ।
