जि तानाशाह सभापति मखु: कोइराला
येँ (सन्ध्या टाइम्स)/नेपाली कांग्रेसया सभापति सुशील कोइरालां नेता शेरबहादुर देउवां द्वपं बियादी थें थः तानाशाह सभापति मखु धयादीगु दु। कांग्रेस नेता देउवां छुं दिं न्ह्यवंनिसें सार्वजनिक रुपं हे पार्टीया सभापति कोइरालां पार्टीयात न्ह्यःनेलाःथे यात बिया वयाच्वंगु द्वपंया खण्डन याये कथं सभापति कोइरालां थ्व खँ धयादीगु खः ।
थौं सुथय् येँ इचंगु नारायण गाविसय् याःगु न्हूदँ, छठ पर्व व स्वन्ति नखःया भिंतुना कालबिल नापं स्मारिका बिमोचन ज्याझ्वलय् न्ववासें सभापति कोइरालां पार्टीयात व्यवस्थित व मर्यादित यायेगु थःगु न्हापांगु स्वार्थ खः धासें फुक्कं मिले जुयाः वनेमाःगु अवस्था दु धकाः नं धयादिल ।
सभापति कोइरालां पार्टी दुने लिपांगु इलय् वयाः संस्थागतसिबें ब्यक्तिवादी प्रबृत्ति हावी जुया वल धासें व प्रवृत्तिं पार्टीयात धरासायी याइ धकाः नं धयादिल।
सभापति कोइरालां महाधिवेशन क्वचाःगु ताः ई तक नं कार्यसमितिं पूर्णता काये मफयाच्वंगु दुर्भाग्य खः धयादिल। उगु ज्याझ्फवलय् कांग्रेसया नेता अर्जुन नरसिंह केसीं मुलुकयात संकटं मुक्त यायेगु नितिं फुक्क हे राजनीतिक दलतसें चिन्ता जक कयां मजिउ फुक्कं हे गम्भीर जुयाः न्ह्याः वनेमाः धकाः नं धयादिल ।
माओवादी अध्यक्ष प्रचण्डं न्हापा हिंसात्मक क्रियाकलाप कांग्रेसया नेता गिरिजाप्रसाद कोइरालालिसेया सहमति हे जूगु धकाः बियादीगु अभिब्यक्तियात कयाः नेता केसीं आपत्ति प्वंकादीगु खः। प्रचण्डं कांग्रेसयात बदनाम यायेत उज्वःगु अभिब्यक्ति बिउगु खः धासें वय्कलं कांग्रेस पार्टी गम्भीर जुयाः वनेमाः धकाः नं धयादिल ।
