न्हूदँया लसताय् न्हूगु सफू

येँ (सन्ध्या टाइम्स)/ ओलम्पस क्लबया ग्वसालय् म्हिगः छगू ज्याझ्वःया दथुइ प्रा. सुवर्ण शाक्यया 'ल्याः कथंया सीकेखँ' सफूया उलेज्या नेपाल संवत् राष्ट्रिय न्हूदँ समारोह समिति-११३२या नायः पद्मरत्न तुलाधरं यानादिल। सफूया उलेज्या यासें नायः तुलाधरं नेवाःत छथाय् जक च्वनाः पुलांगु परम्पराय् लिकुनाच्वने मजिउगु खँ कनादिल। नेतृत्वय् क्षमता दुगु वर्गं सहलह ब्याकाः रचनात्मक ढंगं न्ह्यचिलेमाःगु खँ नं कनादिल। ज्याझ्वलय् सफूया च्वमि शाक्यं झीसं थःगु संस्कृति व थःगु म्हसीकाः ल्वःमंकाः मेपिनिगु भरय् च्वनाः थःगु संस्कृतिया अवहेलना यानाच्वनागु दु धइगु खँ कनादिल। अध्ययन यायेगु कुतः मदयाः करपिंके न्यय् कायेगु बानी नेवाःतय्गु जुइ धुंकूगु यथार्थ खँ कनादिसें वय्कलं संक्षिप्त रुपं अध्ययनया निंतिं पितब्वज्या जूगु सफुलिं ग्वाहालि याइगु खँ नं कनादिल। ज्याझ्वलय् जनकवि दुर्गालाल श्रेष्ठं च्वमि चाःचू ज्याय् तमक्यंसे छगू हे विषयलय् समाधिष्ट जुयाः च्वल धाःसा उगु च्वसु नेपालभाषाया निंतिं तःधंगु धुकू जुइफु, धयादिल। नायः पवित्र वज्राचार्यया सभापतित्वय् जूगु ज्याझ्वलय् शिक्षाविद् लक्ष्मण राजवंशीं नं थःगु नुगःखँ तयादीगु खःसा छ्यांज्य रोशन शाक्यं लसकुस यानादीगु खः ।