थौं यलय् बसु सिरपाः लःल्हाइगु
यल (सन्ध्या टाइम्स)/रोटरी क्लब यलपाखें थौं छगू ज्याझ्वःया दथुइ थःगु पेसाय् न्हापांनिसें लगे जुया वयाच्वंपिंत थीथी सिरपाः व सम्मान लःल्हाइगु जूगु द।
थःगु परम्परागत पेसा कथं लाकां सुइगु ज्याय् निरन्तर रुपं लगे जुयाच्वंम्ह ८७ दँ दुम्ह रोक्का सार्कीयात 'बसु सिरपाः' व नेवाः छेँ दनेगुलिइ न्हापां निसें मदिक्क थःगु पेशाय् संलग्न जुयाच्वंम्ह ग्वारा अवालेयात 'पुष्प सिरपाः' लःल्हाइगु जूगु दु। थ्व निगुलिं सिरपाःया दां न्याद्वः तकाया खः ।
अथे हे थःपिनिगु ज्याय् निरन्तर रुपं लगे जुयाच्वंपिं स्वम्हेसित हनीगु नं ज्याझ्वः दु। थःथःगु ख्यलय् ताःई न्ह्यःनिसें सक्रिय जुयाः योगदान बिया च्वनादीपिं रत्नराज बज्राचार्य, तुल्सीराज जोशी व मोहन ब्यञ्जनकारपिंत हनेत्यंगु खः ।
बसु सिरपाः क्लबया दुजः सुरेन्द्रगोविन्द जोशीं पलिस्था यानादीगु खःसा पुष्प सिरपाः नेवाः पहःया कालीगढीया ज्या नापं नेवाः पहःया पुलांगु छेँ दयेकेगुलिं सक्रिया जुयाच्वंपिंत बीगु खः। थौंया ज्याझ्वःया मंगःया कात्ति दबुलिइ जुइ। रोटरी क्लब यलं वंगु झिप्यदँ न्ह्यवंनिसें न्हूदँया लसताय् लाकाः थुकथंया ज्याझ्वः याना वयाच्वंगु खः ।
