नेपाल संवत्या पक्षय् सरकारया निर्णय

नेपाल संवत्या न्हूदँया न्ह्यःने थ्यंकाः सरकारं नेपाल संवत्यात राष्ट्रिय मान्यता बीमाः धइगु नारा थ्वयेकाः आन्दोलन याना वयाच्वंपिं लय्ताइ कथं छगू निर्णय याःगु दु। आवंलि सरकारी क्यालेण्डरय् नं नेपाल संवत् छ्यलेगु व नेपाल संवत्यात व्यावहारिक रुपं छ्यलेगु बारे निर्णय यायेत छगू आयोग स्वनेगु ज्या सरकारं नकतिनि याःगु दु। नेपाल संवत्यात राष्ट्रिय मान्यता बीकेगु लागिं न्ह्यानाच्वंगु आन्दोलनं वंगु ताः ई न्ह्यवंनिसें थ्व माग यानाच्वंगु खः। आः थ्वहे आन्दोलनया नेतृत्वय् च्वनादीम्ह भाजु पद्मरत्न तुलाधरया संयोजकत्वय् आयोग स्वना बिउगुलिं नेपाल संवत्यात गथे यानाः व्यवहारय् छ्यलेगु धकाः पिहां वयाच्वंगु विवादया निरुपण जुइगु विश्वास काये फइ ।

खतुं नेपाल संवत्या बारे आयोग गठन जूगु थ्वहे न्हापांगु मखु। थ्व स्वयां न्ह्यः नं सरकारं छगू आयोग गठन यानाः ज्या न्ह्याकूगु खः। तर उगु आयोगपाखें न छुं ज्या यात, न थःत बिउगु भाला कथं प्रतिवेदन हे लःल्हात। छगू कथं आयोग वेवारिसे जुयाः हे क्वचाल। थज्याःगु पृष्ठभूमिया दथुइ आः हानं सरकारं मेगु आयोग गठन याःगु दु। थुकी विज्ञ मनूत तयाः चीधंगु आकारं दयेकूगुया लिसें लछिया दुने प्रतिवेदन बीमाः धकाः म्हो जक ई बिउगु दु। ई म्हो जूगुलिं याकनं ज्या सिधइगु छगू लबः दुसा मेखे देशय् नेपाल संवत्यात गय् यानाः प्रयोग यायेगु धकाः सुझाव बीगु थेंज्याःगु महत्वपूर्ण ज्या लछिं गथे याये फइ धइगु नं छगू समस्या दनि। तर समस्या न्ह्यागु जूसां आयोगं द्रुत गतिं ज्या निं सुरु यानाः क्यनेमाः। ज्या याकनं न्ह्यात धाःसा मेमेगु समस्यात स्वतः समाधान जुया वनी ।

More Stories Like this