बसन्तपुलिइ नेवाः स्वायत्त राज्यया ध्वाँय् ब्वयेकल

नेवाः देय् गुथि नेपालमण्डलं नेपाल संवत् ११३२ न्हूदँयात लसकुस याये कथं बुधवाः येँया बसन्तपुलिइ च्वंगु दशअवतारया दबुलिइ नेपाः देय् नापं नेवाः स्वायत्त राज्यया ध्वाँय् ब्वयेकल ।

ज्याझ्वःया मू पाहाँ नापं उपप्रधान लिसें परराष्ट्र मन्त्री नारायणकाजी श्रेष्ठ 'प्रकाश' व देय् गुथिया नायः मोहन बहादुर महर्जनं नेवाः स्वायत्त राज्यया ध्वाँय् ब्वयेकादीगु खः । वस्वयां न्ह्यः नेपालभाषा मंकाः खलःया नायः पद्मरत्न तुलाधर व नायः महर्जनं मंकाः कथं ध्वाँय् ब्वयेकादीगु खः ।

न्हूदँया लसताय् न्हूगु संविधानय् नेवाः स्वायत्त राज्यया सुनिश्चितताया निंतिं दबाव बिइ कथं बसन्तपुलिइ ध्वाँय् ब्वयेकूगु इलय् किपू, त्वखाः, धौख्यः, पन्ति लगायत झिंच्यागू थासं नं छक्वलं नेवाः स्वायत्त राज्यया ध्वाँय् ब्वयेकूगु खः ।

ज्याझ्वलय् उपप्रधानमन्त्री प्रकाशं नेवाःतय्सं न्ह्याकूगु नेपाल संवत् आन्दोलनपाखें हे भाषिक, जातिय नापं संघीयताया आन्दोलनं गति काःगु धयादिल । वय्कलं आः देय् संघीय नेपाः व उकि दुने नेवाः स्वायत्त राज्य दइगु व्यवस्थापाखें लिउने वनेमफइगु धयादिल ।

मंकाः खलया नायः तुलाधरं संघीयता व स्वायत्त राज्य बिइगु खँय् प्रमुख राजनीतिक दलत झन् झन् लिउने वानाच्वंगुलिं झीगु आन्दोलन बःचाधंगु ज्याझ्वः व सच्छि निसः मनूत मुनाः पूमवनीगु धयादिल । वय्कलं नेवाः स्वायत्त राज्य प्राप्तिया निंतिं आः छेँखाः छेँखाःपतिकंया नेवाःत मुनाः संघर्ष यायेमाःगु खँय् बः बियादिल ।

नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दरं न्हूगु संविधानय् आत्मनिर्णयया अधिकार व अग्राधिकार सहितया नेवाः स्वायत्त राज्यया व्यवस्था मजूसाः वयां लिपा नं थःपिनिगु संघर्ष जारी हे जुइगु धयादिल । वय्कलं अज्याःगु संघर्ष धइगु मू मू राजनीतिक दलत विरुद्ध जुइगु नं न्ह्यथनादिल ।

ज्याझ्वलय् सभासद्त मंगलसिद्धि मानन्धर, सपना मल्ल प्रधान, बुद्ध साय्मि लगायतं नं नेवाः स्वायत्त राज्य प्रति एक्यबद्धता प्वंकूसें थःपिसं संसद दुनेपाखें अधिकार प्राप्तिया निंतिं संघर्ष यानाच्वनीगु धयादिल ।

देय् गुथि नेपालमण्डलया नायः मोहन बहादुर महर्जनया सभापतित्वय् जूगु ज्याझ्वलय् नेवाः देय् दबूया नायः नरेश ताम्राकार, देय् गुथिया संरक्षक राजेन्द्र श्रेष्ठ, चुन्द बज्राचार्य लगायतं नं थःगु नुगः खँ प्वंकादीगु खः । देय् गुथि नेपालमण्डलया मू छ्याञ्जे कृष्णभक्त मानन्धरं ज्याझ्वःलय् लसकुस यानादीगु खः ।

More Stories Like this