हानं सतकय् खने दत माओवादीया कचवं

सत्तारुढ पार्टी एनेकपा (माओवादी) दुने उकुन्हु छुं न्हि मत्थर जुइधुंकूगु आन्तरिक कचवं आः हानं सुरु जूगु दु। खास यानाः प्रधानमन्त्री डा. बाबुराम भट्टराईं भारत वनाः हस्ताक्षर याना वःगु लगानी संरक्षण सम्झौताया कारणं पार्टी दुने क्वलायेधुंकूगु थ्व कचवं हानं पिहां वःगु खः। वामपन्थी नेतातय् छगू खराब बानी छु दु धाःसां थःत मयल धायेवं थः तसकं हे मिले जूपिं पासापिंत नं न्हापा जूसा दरवारपाखें सञ्चालित व आः चाहिं भारतपाखें सञ्चालित धकाः द्वपं बीगु याइ। थुगुसी नं अथे हे जूगु दु। पार्टी अध्यक्ष प्रचण्डयात वहे पार्टीया महासचिव रामबहादुर थापा (बादलं) भारतीय गुप्तचर संस्था 'र' पाखें सञ्चालित धकाः द्वपं बिल। उखे भारतं लिहां वःम्ह प्रधानमन्त्री भट्टराईयात माओवादीया हे वैद्य पक्षीय कार्यकर्तातय्सं हाकुगु ध्वाँय् क्यन। उकिया लिसें पार्टीया अध्यक्ष प्रचण्डं थःगु हे पार्टीया महासचिवयात थः 'रपाखें संचालित खःसा प्रमाणित यानाः क्यँ' धकाः खुल्ला रुपं हाथ्या बिल। आः च्वनीगु पार्टीया नियमित बैठकय् थज्याःगु ल्वापुख्यापु अझ तच्वया वनीगु खँय् शंका मदु। वास्तवय् छुं नं कथंया अनुशासित पार्टी दुने जुइ जिउगु ज्याखँ थुपिं मखु। थुपिं ज्याखँतय्सं माओवादी छधी मखु झन् हे विभाजनपाखे वनाच्वंगु दु धइगु संकेत जक बी। थज्याःगु अभिव्यक्तितय्सं छधी जुइगु सम्भावनातय्त नं झन् स्यंकेगु जक ज्या याइ। पार्टी दुने हे समाधान यायेमाःगु विषयतय्त, पार्टी दुने खँ तयेगु थाय् दयेक दयेकं थथे पिने वयाः सार्वजनिक अभिव्यक्ति बिया जुइगु बांलाःगु ज्या मखु। थुकियात पार्टी नेतृत्वंनिसें हे तुरुन्त बन्द यानाः आन्तरिक रुपं ज्यंका छ्वयेमाः ।

More Stories Like this