खिचा पुजा व झी

सुरेश शाक्य 'लप्ते'

पप्पी .... आ .... आ ....।
अय् .... पप्पीचा .... वा .... वा ....। गन वन व पप्पीचा? थौं झन धकाः बांलाक पुजा तयाः साःसाःगु नकेमाः धकाः न्हापां दनाः मरि छुनाः पुजा ज्वलं तयाः हयां ला ....। व बेमान खिचा पप्पीचा गन वं गन वं का !'
धाधां भुनुभुनु हालाच्वन तिरि मय्जु।
कःसिं क्वस्वयाः - �पप्पी ....। अय् .... पप्पीचा .... आ .... आ .... ' धकाः सती हाकनं ।

ग्व वःगु हे मखु का!, गन वं गन वं का ....?
'अय् बौम्ह ! दनादी मत्यःनि ला? याकनं दनादिसँ। स्व व पप्पीचा गन वं गन वं का। पिहां वन कि ला दुहां हे वइ मखुका। याकनं दनाः पप्पीचा छक्वः माला हयादिसँ ले।'
'छाय् थौं पप्पीचा सःताच्वनागु? न्हापा लिपा जूसा दना खतं तुफि ज्वनाः लित्तु लिनाः दाः जुइगु। थौं तुफिं मुइके मखनाः पप्पीचित सःताच्वनागु ला?'

'गन खः धकाः ....। थौं खिचा पुजा धकाः मसिउ ला? झन धकाः व पप्पिचित पुजा यानाः नकेमाः धकाः सेल, माल्पा छुनाः पुजा ज्वलं तयाः वयां ला गन वं गन वं काः।'
'गन हे वनी धकाः पप्पीचा छ्रं हे मुइकी धकाः सुलाच्वन जुइका। थौंकन्हय् खिचात नं चलाख जुइधुंकल का छु। न्हापा येँ म.न.पा. या कर्मचारीतय्सं नं ला आः .... आः .... धकाः माया यानाः सःताः विष नकाः कयौं खिचात स्याःगु गनं ल्वःमंकी धकाः व खिचातय्सं। व हे मनूतय्गु सुरक्षाया निंतिं चांन्हि मधासे पाः च्वना जुइगु, सुं छम्ह म्हमसिउम्ह वःसा चिल्लाय् दनाः हालाः सकसितं सतर्क याइगु अले व हे खिचायात छुं भचा नके माल धकाः स्याना छ्वयेगु गन तक पाय्छि खः? थ्व ला कतिलाः पाकः मनूतय्गु तःधंगु हे अन्याय खः बाः ....।'

'ख ला खिचातय्गु एकता मदयाः जक थन बन्द हडताल मजूगु खः। मखुसा ला उकुन्हु थापाथलीइ छम्ह माकःयात मोटरसाइकलं क्ययेकाः स्याःगु विरोधय् माकःतय्सं चक्का जाम यानाः वक्वसित झम्ते याः थें। खिचातय्सं नं बन्द हडताल यायेधुंकल जुइका। नयेथाय् दतकि ल्वाये माःपिं जुयाः थन भचा शान्त जुयाच्वंगु खः। हाकनं थनया नेतातय्सं नं ला थ्व हे खिचातय्गु बानी त्याये कयातःगु दुनि। नये दतकि न्हिप्यं थुकुथुकु, नापं च्वनाः नये माःसा ह्याउँ .... ह्याउँ .... यानाः ल्वाइगु ।'

'का का, म्वाःल आम बुरा नवयेक हालाच्वने म्वाःल। पुजा छक्वः सिधयेकाः क्वाक्क च्या छगू त्वने धयां म्वाः मदुगु खँ ल्हानाच्वनादी का।'
'तलय् कःसिइ वनाः स्वः हुँ रे - छं मुइकी धकाः ग्यानाः सुलाच्वन जुइ का।'
'मदु धयां तलय् कःसिइ नं। कुने क्यबय् नं मदु। गुलि सःते धुन ।'

'का .. का. आसे जिं पिने वनाः स्वः वने। बरु जितः च्या छगू निं त्वंकि रे।'
'गन च्या�चि त्वनेगु द्यः पुमज्यासें। खिचा पुजा यानाः तिनि त्वनेगु का।'
'अहो ....। थौं ला धाथें हे का, थ्व मिसा ला। न्हापा लिपा जूसा लित्तु लिनाः तुफिं मुइकः जुइगु थौं जुलं वहे खिचायात पुजा यानाः जक च्या त्वनेगु हं ....। जि हे मजिल बाs। क्वाक्क च्या त्वनेत जूसां पप्पीचित सःते हे माल। पप्पी ! अय् पप्पीचा !

क्वथाया हे सोफा तःलं फुत्त धायेक पिहां वयाः न्हिप्यं थुकुथुकुं संकाः न्ह्यःने दं वल। 'उ का पप्पि थन हे दुनि, गुलि कथु सुक्क हालाच्वंगु जुइ।'
'अय् .... खः ला, गुलि सःते धुन का पिहां हे वःगु मखु ...।'
'आ .... आ .... पप्पी .... वा ..... का ....न .... ना ....' धाधां मरि छपा न्ह्यच्याकल ।

पुजा यानाः क्वचायेका। पप्पी .... धकाः छ्यनय् पित्तु पिया। माया यानाः गुलि ज्ञानीम्ह पप्पीचा थ्व धकाः। का थ्व मरि नं न, अले छंत ला तयाः साक्क जा नके न्हैं धकाः न्वानाच्वन ।

बिचरा खिचायात छु माल। न्हापा लित्तु लिनाः दाइगु थौं तिवां तिवां सःताः साःसाःगु नकूगुलिं लय्ताः। न्हिप्यं थुकुथुकुं संकाः तिंतिं न्हुयाः प्याखं हुली।
दक्वं भाय् थू .... थ्वं। लाः ....लाः .... थाय् फोहोर याइगु बानी छतां यानाः का, स्याये हे मास्ति वइगु का गबलें .... गबलें .... ।

More Stories Like this