शाक्य फाउण्डेशनया भिंतुना कालबिल
येँ(सन्ध्या टाइम्स)/दी शाक्य फाउन्डेशन नेपालया ग्वसालय् थनया २८ वडा श्रीघलय् नेपाल संवत् ११३२ न्हूदँया लसताय् भिंतुना कालबिल ज्याझ्वः जुल। नःघः सर्वसंघया थकालि रत्नमान शाक्य व सल्लाहकारपिं डा. बज्रराज शाक्य, हर्षमुनि शाक्य व संघरत्न शाक्यपाखें संयुक्त रुपं बोधिमत च्याकाः ज्याझ्वःया औपचारिक उलेज्या यानादीगु खः।
डा. बज्रराज शाक्य, नरेशवीर शाक्य, हर्षमुनि शाक्य व संघरत्न शाक्यपिंसं भिंतुना न्वचु बियादीगु उगु ज्याझ्वलय् फाउण्डेशनया दांभरि राजकाजी शाक्यं लसकुस यानादीगु खःसा महासचिव अमीरमान शाक्यं सुभाय् बियादीगु खः। ज्याझ्वलय् जनक "नेवाः" शाक्यया च्वसा व संकलनय् दुगु :नेपालको शाक्य समुदाय - जनसंख्या" सफू सल्लाहकार डा. बज्रराज शाक्य व थकालि
रत्नमान शाक्यं मंकाः कथं उलेज्या यानादीगु खः। उगु हे ज्याझ्वलय् फाउण्डेशनया साधारण सभाय् हुलाप्याखं व क्रियटिभ आर्टया तालिमय् ब्वति काःपिं सहभागीपिंत दसिपौ नं लःल्हाःगु खः। फाउण्डेशनया नायः जनक "नेवाः" शाक्यया सभापतित्वय् जूगु उगु ज्याझ्वलय् सफूया च्वमिलिसें संकलक भाजु जनक "नेवाः" शाक्यं हे सफूया विषयय् जानकारी बियादीगु खः।
