प्रचण्ड व बाबुराम माओवादीइ च्वनेगु अधिकार मदु: गजुरेल

येँ(सन्ध्या टाइम्स)/एकीकृत माओवादीया सचिव सीपी गजुरेलं क्रान्तिया लँ त्वःतूपिं पार्टीया अध्यक्ष प्रचण्ड व उपाध्यक्ष डा. बाबुराम भट्टराईयात माओवादी पार्टी दुने च्वनेगु अधिकार मदु धयादीगु दु।
क्रान्ति पूरा मजूनिगुलिं आः क्रान्तिया लँ त्वःतूम्ह अध्यक्ष प्रचण्ड व उपाध्यक्ष भट्टराईयात पार्टीं छुट्टी बीगु दावी नं वय्कलं यानादिल।
सिन्धुलीया कमलामाई नगरपालिका वडा नं. ५ या देउवालीइ थौं सुथय् 'जनतानाप सभासद कार्यक्रम'य् न्वावसें सचिव गजुरेलं अथे धयादीगु खः।
वय्कलं माओवादी पार्टी दुने च्वनाच्वनेगु नितिं नेतृत्वं क्रान्तिया खँल्हाःसां नं लँ धाःसा त्वःतूगु दु धकाः नं दावी यानादिल।
क्रान्ति अधुरो जुयाच्वंगुलिं क्रान्तिया खँ त्वःताः शान्तिया निंतिं जक न्ह्याः वनीपिं माओवादी जुइ हे मदु धासें वय्कलं क्रान्तिया स्वरुप हिलावंगु चर्चा यानादिसें आः क्रान्तिया न्हून्हूगु कथंया प्रयोगत जुयाच्वन धकाः नं धयादिल। क्रान्ति पूरा मजुयाः हे जनतां दुःख कष्ट नयाच्वनेमाःगु खः धयादिसें वय्कलं नेतृत्वं क्रान्तिया लँ त्वःतावंगुलिं बन्दुक ल्ह्वनागु हे गल्ती थें च्वनावल धकाः नं टिप्पणी यानादिल।
भारतनाप याःगु बिपा सम्झौता राष्ट्रघातटी हे खः धासें गजुरेलं भारतय् चले मजूगु उद्योग धन्दा फुक्क नेपालय् हइगु अले घाटा ब्यहोरे यानाः नेपाल सरकार ताथ जुइगु खुलासा नं यानादिल। 'विहार व उत्तर प्रदेशय् चले मजूगु उद्योगधन्दा फुक्कं नेपालय् हइ अले घाटा क्यनाः सरकारयाके ध्यबा कायेगु ज्या याइ' वय्कलं धयादिल।
प्रधानमन्त्री भट्टराईया अर्थशास्त्र बिचित्रया जूगु टिप्पणी यासें वय्कलं प्रधानमन्त्री भारतया दलाली जुल धकाः नं द्वपं बियादिल।
भारतया गुप्तचर संस्था 'र' बाय् मेगु छु कारणं नेतृत्व बिचलन जूगु खः धइगु खँ थनिनिसें जुइगु पार्टीया स्थायी समितिया मुँज्यां स्पष्ट जुइ धयादिसें वय्कलं बाबुरामया नेतृत्वय् दुगु वर्तमान सरकारं चमत्कार याइ धकाः बुद्धिजीवीतय्त लानाच्वंगु भ्रम आः बुलुहुँ चिला वनाच्वंगु दु धकाः नं धयादिल।
देय्या संविधान सभासद्तय्गु कारणं दयेके मफुगु मखुसे राजनीतिक दलतयगु दथुइ सहमति जुइ मफयाः हे दयेके मफयाच्वंगु खँ नं वय्कलं धयादिल।