नेपाल संवत् छ्यलेगु निर्णय
पद्मरत्न तुलाधरया नेतृत्वय् कार्यदल गठन
सरकारं नेपाल संवतया प्रवर्तक शंखधर साख्वाःया नामं प्रतिष्ठान दयेकीगु
येँ (सन्ध्या टाइम्स)/थौं सुथय् च्वंगु मन्त्रिपरिषद्या बैठकं राष्ट्रिय संवत् नेपाल संवत्यात सरकारी पात्रोय् तयेगु व सरकारी ज्याखँय् नं छ्यलेगु निर्णय याःगु दु ।
सरकारं नेपाल संवत्यात व्यवहारिक रुपं कार्यान्वयनय् हयेगु निंतिं माःगु अध्ययन यायेत नेपाल संवत् आन्दोलनया न्ह्यलुवा पद्मरत्न तुलाधरया संयोजकत्वय् छगू कार्यदल दयेकूगु दु। नेपाल संवत अध्ययन तथा सुझाव कार्यदल धइगु नां तःगु उगु कार्यदलया दुजलय् हरिनारायण मल्ल व कुमार योञ्जनयात दुजः कथं तःगु खः। हरिनारायण मल्ल ज्योतिषशास्त्रया विज्ञ खःसा कुमार योञ्जन जनजाति आन्दोलनया न्ह्यलुवा खः।
मन्त्रिपरिषद् बैठक लिपा संचारकर्मीलिसे खँल्हासें सरकारया प्रवक्ता समेत जुयाच्वंम्ह उपप्रधान नापं परराष्ट्रमन्त्री नारायणकाजी श्रेष्ठ 'प्रकाशं' थुकिया जानकारी बियादीगु खः ।
उपप्रममन्त्री श्रेष्ठं उगु कार्यदलयात नेपाल संवत्यात गुकथं ब्यवहारय् छ्यले फइ धकाः अध्ययन यानाः लच्छिया दुने प्रतिवेदन लःल्हायेगु निर्देशन बिउगु खँ नं कनादिल।
अथे हे बैठकं नेपाल संवत्या प्रवर्तक शंखधर साख्वाःया नामं शंखधर साख्वाः राष्ट्रिय प्रतिष्ठान दयेकेगु निर्णय नं याःगु दु ।
नेपाल संवत् राष्ट्रिय न्हूदँ समारोह समिति ११३२ या नायः पद्मरत्न तुलाधरया नेतृत्वय् म्हिगः प्रधानमन्त्री निवास वालुवाटार वंगु समारोह समितिया पुचःयात प्रम भट्टराईं नेपाल संवतयात ब्यवहारिक रुपं छ्यलेत थौंया मन्त्रिपरिषद् बैठकं निर्णय यायेगु बचं बियादीगु खः ।
उगु पुचलं नेपाल संवत् ११३२ या न्हूदँ कुन्हु थुगुसी खुल्लामञ्चय् जुइगु विशेष समारोहय् मूपाहां जुयादीत नं प्रमयात इनाप याःगु खःसा प्रमं उकियात स्वीकार यानादीगु खः। अथे हे पुचलं नेपाल संवतया प्रवर्तक शंखधर साख्वाःया नामं प्रतिष्ठान दयेकेमाःगु व शंखधरया नामं कोष तयेमाःगु माग नं याःगु खः। प्रम भट्टराईं उकी नं सकारात्मक लिसः बियादीगु दु ।
