पद्मरत्नया संयोजकत्वय् ने.सं. अध्ययन व सुझाव आयोग नीस्वन
नेपाःया मौलिक नापं राष्ट्रिय संवत् नेपाल संवतयात व्यवहारिक रूपं छ्यलेगु निंतिं नेवाः न्ह्यलुवाः नापं नेपालभाषा मंकाः खलःया नायः पद्मरत्न तुलाधारया संयोजकत्वय् सरकारं नेपाल संवत् अध्ययन व सुझाव आयोग नीस्वंगु दु ।
सिंहदरवारय् मंगलवाः च्वंगु मन्त्रिपरिषद्या मुँज्यां संवतयात व्यवहारय् कार्यान्वयन यायेगु निंतिं उगु आयोग नीस्वनेगु निर्णय याःगु खः । तुलाधरया संयोजकत्वय् नीस्वंगु समितियात संवतया व्यवहारिक रुपं गुकथं छ्यलेफइ धइगु विषयलय् अध्ययन यानाः लच्छिया दुने प्रतिवेदन लःल्हायेगु भालाः बिउगु दु । स्वम्ह दुजः दुगु समितिइ हरिनारायण् मल्ल व कुमार योञ्जन दुजः कथं दुगु खँ सरकारया प्रवक्ता नारायणकाजी श्रेष्ठ 'प्रकाशं' कनादिल ।
अथेहे सरकारं नेपाल संवतयात राष्ट्रिय क्यालेण्डरय् दुथ्याकेगु निर्णय नं याःगु दु । नापं सरकारं राष्ट्रिय विभूति शंखधर साख्वाःया नामं शंखधर साख्वाः राष्ट्रिय प्रतिष्ठान नीस्वनेगु निर्णय नं याःगु दु ।
थ्वस्वयां न्ह्यः ने.सं. ११२०स नेपाल संवतया प्रवर्तक शंखधर साख्वाःयात सरकारं राष्ट्रिय विभूति कथं सम्मान याःगु खःसा ने.सं. ११२२स शंखधरया लुमन्तिइ हुलाक टिकट पिथनेगु ज्या जूगु खः । अथेहे ने.सं. ११२९स नेपाल संवतयात सरकारं राष्ट्रिय मान्यता बिउगु खः ।
