भण्डारीयात बर्खास्त यायेवं समस्या ज्यन?

रक्षामन्त्री शरतसिं भण्डारीं तराईया २२ गू जिल्ला ब्यागलं जुइफु धकाः बिउगु अभिव्यक्तियात कयाः सदनय् हंगामा जुल। अन्ततः वय्कःयात सरकारं हे पितिना छ्वत। तर मन्त्री भण्डारीयात पितिना छ्वयेधुंकाः वय्कलं गुगु सन्दर्भय् देश कुचा जुइफु धकाः अभिव्यक्ति बियादीगु खः, व सन्दर्भ सिधल ला?

मन्त्री भण्डारीं मुलुक कुचा जुइ धकाः बियादीगु अभिव्यक्ति स्वयमय् आपत्तिजनक खः, उकी शंका मदु। तरवय्कलं गुगु सन्दर्भयात स्वानाः उगु खँ धयादीगु खः, उकी धाःसा बिचाः यायेमाःगु खनेदु। मू खँ तराईया जनताया अधिकारलिसे स्वानाच्वंगु दु। तराईया जनताया अधिकार धकाः थौंकन्हय् मधेसवादी पार्टीतय्सं गुगु माग न्ह्यःने हयाच्वंगु खः उकियात पूवंके फइगु अवस्था मदु। तर पूवंके फइ मखु धकाः संवोधन हे मयायेगु धाःसा पाय्छि मखु। संवोधन तकं मजुल धाःसा उकिया लिच्वः मन्त्री भण्डारीं धाः थेंज्याःगु अवस्था तक मवनी नं धाये मफु। मन्त्री भण्डारीया धापूयात कयाः एमाले, कांग्रेस व माओवादीया छगू पक्षं तकं विरोध यात। तर मधेसवादी पार्टी व गुगुं नं मधेसवादी संघ संस्थातय्सं विरोध मयाः। थ्व खँयात नजरअन्दाज याये मजिउ। तराईया २२ गू जिल्ला कुचा दली धकाः बिउगु अभिव्यक्तियात उगु २२ गू जिल्लापाखें छाय् विरोध मजुल? छु थ्व २२ जिल्लायात मुलुक कुचा जुइ धकाः चिउताः मदु? छु उमिगु मौनता शरतसिं भण्डारीया धापू प्रति स्वीकृति खः? थ्व अवश्य नं विचारणीय पक्ष खः। थुकिं क्यं, भण्डारीयात बर्खास्त यायेवं जक वयागु अभिव्यक्ति समाप्त जूगु मदुनि ।

More Stories Like this