ईलोहं प्रकाशनया द नेवारल्याण्ड

पुष्परत्न ताम्राकार 'स्वीटहर्ट'

ईलोहं प्रकाशनया न्हय्गूगु पिथना कथं छगू अंग्रेजी भाय्या पत्रिका 'द नेवारल्याण्ड' नकतिनि हे जक पिदंगु दु। गुकिया विमोचन वंगु ने.सं. ११३१ यंलागा एकादशि (वि.सं. ०६८ असोज ६ गते शुक्रवाः) चेम्बर भवनय् नेपालभाषा एकेडेमीया चान्सलर नापं संस्कृतिविद् सत्यमोहन जोशीजुं "ईलोहं प्रकाशन" या झिंनिदँ बुदिंया लसताय् यानादिल। थुकिया प्रधान सम्पादक नरेशवीर शाक्य खःसा उपसम्पादक राजेन्द्र मानन्धर खः ।

खतुं ईलोहं प्रकाशनं थःगु प्रकाशन नीस्वंसांनिसें खुगू खुगूमछि नेपालभाषाया पत्रिकात निरन्तर रुपं पिथना वयाच्वंगु दु। गथे कि १) ईलोहं (मचा लय्पौ), २) नःलि (साहित्यिक पत्रिका), ३) लाय्कू (निगू भाषाया बाःछिपाखै), ४) पेज थ्री (न्हू पुस्ताया पौ), ५) नेपाल लिपि पौ (प्रचलित नेपाल लिपिया पौ) व लुँआखः (रञ्जना लिपिया पौ)। अथे हे आः अंग्रेजी भाय्या पत्रिका 'द नेवारल्यान्ड' न्हय्गूगु पिथना कथं पिथंगु दु। थौंकन्हय्या न्हू पुस्तायापिंसं नेवाः भाय् बांलाक ल्हाये, च्वये मसयाः व नेवाःया गतिविधि, तजिलजि आदि मसियाः ल्वःमंका हे वनाच्वंगु वाःचायेकाः अज्याःपिंत वाःचायेका बीगु तातुनाः अंग्रेजी भासं पत्रिका पिथंगु खः। छाय्धाःसां थौंकन्हय् अप्वः अंग्रेजी भाय्या लिच्वः लानाच्वंगुलिं अंग्रेजी भासं पिथन कि छुं भतिचा सां उमिगु मन थुखेपाखे क्वःसाः वनी ला धइगु थुगु प्रकाशनया मनसुवा जूगु खनेदु। थ्व नं छगू बांलाःगु हे ज्या खः। ई व लकस कथं न्ह्याः वनेमाःगु इलय् अंग्रेजी भासं नेवाःतय्गु गतिविधि, तजिलजिया बारे हसना बी कथं पिथनेगु धइगु नं बांमलाःगु ज्या मखु। बरु अज्याःपिं न्हू पुस्तायापिंसं थुखेपाखे वाःचायेका बीमाःगु नितान्त आवश्यक खनेदु। मेगु छता खँ छु धाःसा थुगु 'द नेवारल्याण्ड' स्वनिगलय् वाय् स्वनिगलं पिने जक लिकुंका मतसे अन्तर्राष्ट्रिय ख्यलय् तकं थ्यनीगु व्यवस्था याना बीफत धाःसा विदेशय् च्वनाच्वंपिं आपालं आपाः नेवाःतय्सं नं ब्वनेगु ह्वःताः दयावनी अले मसिया वनाच्वंगु गतिविधि नं सीका वनेगुली हःपाः व तिबः जू वनी। उकिं थुखेपाखे छक्वः नं प्रकाशनं मिखा ब्वयेकेमाः थें च्वं ।

वास्तवय् धाथें धायेगु खःसा छगू प्रकाशनं थथे न्हय्गू पत्रिका पिथनाच्वनेगु धइगु चाःचू खँ मखु। छाय्धाःसा थुगु प्रकाशनं थौंतक गुलि नं पिदना वयाच्वंगु दु व फुक्कं निरन्तर रुपं न्ह्यानाच्वंगु दु। थ्व लसताया खँ खः। उकी मध्ये थन लुमंकेमाःगु खँ छु धाःसां नेपाल लिपि गुथि व लिपि थपू गुथिं पिथना च्वनेमाःगु लिपि सम्बन्धी पत्रिकात नं थुगु हे प्रकाशनं पिथनाच्वंगु दु। गथेकि - प्रचलित नेपाल लिपिं पिदनाच्वंगु 'नेपाल लिपि पौ' व रञ्जना लिपिं पिदनाच्वंगु 'लुँआखः'। यदि अथे ह्वःताः दया वन धाःसा मेमेगु लिपिं नं पिदं मवइ धकाः धाये मफु। बरु झीसं ग्वाहालि याना वनेमाःगु दु। छगू हे प्रकाशनं थ्वःगूमछि पत्रिका पिथनाच्वंगुयात च्वमछासें नं मगाः अले सुभाय् नं मबिसें मगाः ।

नेपालभाषाया पत्रिकाया ख्यलय् न्हापा न्हापा झीथाय् नं आपालं हे पत्रिकात पिदनाच्वंगु दुगु खः, गथेकि - नेपालभाषा पत्रिका, इनाप वाःपौ, विश्वभूमि, न्हूगु विश्वभूमि, नेवाः पोष्ट, हेटौंडा वाःपौ, लकस, राजमति, झी, सितु, पासा, ज्यामि, तिकिझ्याः, नकिंझ्याः, पौभाः, स्वनिगः, म्हसीका, सगं, थपू, लुँध्वाखा, योमरि, हिसि, यज्जु, लुँस्वां, मू चुक आदि आदि। तर थुकी मध्ये आपालं पत्रिकां दिपाः काःगु कालं तुं जुल। गबलें दना मवल। उबलय् सुनानं निरन्तरता बियाः थिना बी मफुत। लिपा वयाः नेपालभाषा पत्रिकाया ख्यलय् ऐतिहासिक रुपं थुगु ईलोहं प्रकाशनं खुगू खुगू मछि पत्रिकायात निरन्तरता बियाः पिथना वयाच्वंगु इलय् न्हय्गूगु पिथना कथं 'द नेवारल्याण्ड' नं पिथनेगु धइगु तःधंगु साहसया ज्या खः। झीसं माने यानाः च्वछाये हे माः। उकिं हाकनं छक्वः लिसा कयाः सुभाय् बिसें भिंतुना नं बियाच्वना ।

More Stories Like this