'र'या निर्देशन पुष्टि या
येँ (सन्ध्या टाइम्स)/एकीकृत माओवादी अध्यक्ष प्रचण्डं थम्हं भारतीय गुप्तचर संस्था 'र'या प्रतिनिधित नापलाःगु व इमिगु हे निर्देशनय् ज्या यानाच्वन धकाः वयाच्वंगु द्वपंयात पुष्टि यायेत हाथ्या बियादीगु दु। वय्कःयात 'र' या प्रतिनिधि नापलानाः उमिगु हे निर्देशन कथं ज्या यानाच्वन धइगु थ्व द्वपं धाःसा मेपिं मखुसें वय्कःया थःगु हे पार्टीया महासचिव रामबहादुर थापा बादलं बियादीगु खः ।
थौं सुथय् बाराया सिमरा विमानस्थलय् संचारकर्मीतलिसे खँल्हासें अध्यक्ष प्रचण्डं थःगु पार्टीया महासचिव बादलयात थ्व हाथ्या बियादीगु खः। थम्हं 'र'या प्रतिनिधियात नापलानागु व इमिगु निर्देशनय् ज्या यात धकाः बिउगु द्वपं बेकार व तर्कहीन खः धासें थम्हं 'र'या निर्देशनय् ज्या याःगु खः लाकि मखु निष्कर्ष पिकायेगु आधिकारिक ज्या नेपाःमि जनतां याइ धकाः नं अध्यक्ष प्रचण्डं धयादिल।
प्रधानमन्त्री नापं माओवादी उपाध्यक्ष डा. बाबुराम भट्टराईया नेतृत्वय् दुगु सरकारं भारतलिसे याःगु बिपा सम्झौता बारे मौन च्वना वयाच्वनादीम्ह अध्यक्ष प्रचण्डं कन्हय् च्वनीगु स्थायी समितिया बैठकय् थ्व विषयय् सहलह जुइ धयादिल ।
माओवादीया महासचिव बादलं म्हिगः तिनि थःगु पार्टीया अध्यक्ष प्रचण्डं भारतया गुप्तचर संस्था 'र' या निर्देशनय् ज्या यानाच्वंगु नापं पारिवारिक भेटघाट धाधां 'र'या प्रतिनिधित नापलानाच्वंगु द्वपं बियादीगु खः ।
प्रधानमन्त्रीं थौं संसदय् लिसः बीगु
व्यवस्थापिका संसदय् थौं सनिलय् प्रधानमन्त्री डा. बाबुराम भट्टराईनं भारतलिसे याना वःगु बिपा सम्झौतायात कयाः लिसः बियादीगु जूगु दु। विपक्षी दलत नापं माओवादीया हे बरिष्ठ नेता मोहन बैद्य किरण पक्षधर नेतातय्सं उगु सम्झौतायात कयाः विरोध यानाच्वंगु इलय् प्रधानमन्त्री भट्टराईं थौं लिसः बीत्यंगु खः। अथे हे विपक्षी दलया नेतातय्सं नं संसदय् बिपा सम्झौतायात कयाः प्रतिवाद यायेगु निंतिं तयारी यानाच्वंगु खँ सीदुगु दु। एमालें उकिया विरोध योधुंकूगु दु ।
