नासः चुकय् राजदूततय्त मंकाः म्हपुजा
येँ (सन्ध्या टाइम्स)/हनुमानध्वाखाया ऐतिहासिक नासः चुकय् म्हिगः नेपाःस्थित थीथी देय्या राजदूततय्त मंकाः म्हपुजा यात। नेपाल पेभेलियन कम्पनीया ग्वसालय् जूगु उगु म्हपुजा ज्याझ्वलय् जर्मनी, फ्रान्स, थाइल्याण्डया राजदूत नापं युरोपियन युनियनया मेमेगु देय्या प्रतिनिधितय्सं नं ब्वति काःगु खः ।
मंकाः म्हपुजाय् थीथी देय्या २२ म्ह विदेशी कुटनीतिज्ञतय्त मंकाः म्हपुजा खँ नेपाल पेभोलियम कम्पनीया प्रवन्ध निर्देशक नरेश श्रेष्ठं कनादीगु दु। वय्कःया कथं नेपाः वयाच्वंपिं विदेशीतय्त मंकाः म्हपुजा याःगु थ्व न्याक्वःगुखुसी खः। म्हपुजा सुरु याये न्ह्यः राजदूतावासय् वनाः म्हपुजाया महत्व बारे च्वसुया माध्यमं जानकारी बीगु ज्या नं याःगु खः ।
उगु मंकाः म्हपुजा ज्याझ्वलय् संस्कृतिविद् लिसें साहित्यकार तेजेश्वरवाबु ग्वंगःजुं नेवाःतय्सं याना वयाच्वंगु म्हपुजा संस्कृतिया महत्व, उकिया अर्थ, दार्शनिक पक्षनिसें मेमेगु खँ विदेशीतय्त कनादीगु खः ।
