झापाय् नेपाल संवत्या महत्व बारे गोष्ठी
भद्रपुर (सन्ध्या टाइम्स)/नेपाल संवत् ११३२ न्हूदँया लसताय् झापाया न्हूदँ समारोह समितिपाखें नेपाल संवत्या विषयय् थन छगू गोष्ठी यात ।
गोष्ठीया उलेज्या यासें नेपाल आदिवासी जनजाति महासंघ जिल्ला समन्वय परिषद् झापाया अध्यक्ष प्रेम घिसिंगं खस नेपाली भाषायात राज्यं गुलि मान्यता बियातःगु खः मेमेगु भाषायात नं उलि हे मान्यता बीमाः धयादिल। झी पुचः विराटनगरया सल्लाहकार प्रा. जीवेवश्वर लाखें सरकारं राष्ट्रिय मान्यता बिउसां व्यवहारय् धाःसा छ्यलाबुला मयाःगु द्वपं बियादिल ।
झीगु समाज धरानया पुलांम्ह अध्यक्ष बालकृष्ण हलुवाईं शंखधर साख्वाःयात सरकारं राष्ट्रिय विभूतिया मान्यता बिउ थें नेपाल संवत्यात नं राष्ट्रिय रुपं छ्यलाबुला यायेमाः धयादिल। नेवाः देय् दबू झापाया नायः कृष्ण उदासया सभापतित्वय् जूगु उगु ज्याझ्वलय् न्हूदँ समारोह समितिया संयोजक दिनेश शाक्य, नेवाः पुचः सुरुङ्गाया पुलांम्ह नायः भरत श्रेष्ठ, वर्तमान नायः रत्नकुमार श्रेष्ठ आदिपिंसं न्ववानादीगु खः। ज्याझ्वलय् भाषा प्रशिक्षण ज्याझ्वःया समापन नं जूगु खः ।
