न्हूदँ न्हूकथं हने

नेपाल सम्वत् ११३२ न्हूदँ क्यनीगु न्हि नेवाःतय्गु नितिं जक मखु गैरनेवाःतय्गु नितिं नं उलिहे महत्वपूर्ण व च्वछायेवहःगु न्हि खः । न्हूदँ हनेगु नितिं म्हिगःया गैरसंागठानिक व गैर अधिकारिकरुपं स्वना वयाच्वंगु न्हूदँ समारोह समितियात विदावाजी वियाः थुगसी निसें सामुहिक रुपंहे राष्ट्रिय स्तरया न्हूदँ समारोह समिति दयेकेत ताःलाःगु दु । उकी सकस्यां हनावना तयाम्ह मानव अधिकारवादी नेता पद्मरत्न तुलाधरया अध्यक्षताय् २४२ म्हय्सिगु न्हूदँ समारोह समिति दयेकूगु दु । १०१ म्ह, २०२ म्ह थुगुकथं यक्को मनुत तयाः समिति दयेकेगु परम्पराकथं थुगसी २४२ म्ह सदस्यीय न्हूदँ समारोह समिति दयेकूगुयात परम्परायात निरन्तरता वीगु स्वःगु जक मखुला धैथें आभास व्यू । थुलिमसि मनूत तयाः न्हूदँ समारोह समिति दयेकूगुयात धाःसा व्यवहारिक मजुइहे खनेदु । न्हूदँ समारोह समिति दयेकेत सःतूगु भेलाय् उपस्थिति दक्को फुक्कं तयाः राष्ट्रिय स्तरया न्हूदँ समारोह समिति दयेकेगु कुतः जूसां कुतः व्यवहारिक कम व औपचारिकताय् अप्वः केन्दि्रत जूगु महसूस जू । भेलाय् स्वः जक वःपिन्त नं समिति आवद्ध यायेगु धयागु स्वभाविक मखु ।

न्हूदँयात न्हूगुकथं हनेत थुकी गैर नेवाःतय्त नं संलग्न यायेफयेमाः । समितिइ आदिवासी जनजातिया निसें कयाः मेमेगु जात जातितय्त नं समितिइ आवद्ध याकाः नेपाल सम्वत्यात मात्रै नेवाःतय्गु जक सम्वत् मखु, थ्व देशय् दुने च्वंपिं सकल जात जाति, भाषा भाषीतय्गु सम्वत् खः धका विस्तृत व व्यापकता वियाः वने फतधाःसा जक राष्ट्रिय सम्वत्या मान्यता व्यूगुयात सार्थकता वीफै । मखुसा राष्ट्रया नामय् स्वंगु नेपाल सम्वत्यात राष्ट्रिय सम्वत् खः धकाः नेवाःतय्सं जक हाला सना च्वन धाःसा राष्ट्रिय सम्वत्या मान्यता काये धुकां नं थ्व नेवाःतय्गु जक सम्वत् जुयाच्वनेत वेर मदु । देशया नितिं छुं यायेगु धयागु देश दयेकेगु ज्या खः । आर्थिक, सामाजिक, धार्मिक न्ह्याग्गु क्षेत्रय् ज्या याःसां व व्यक्तिगत मजुल धाःसा व राष्ट्रिय जुइ । नेवाःतय्सं थौं तक्क गुलिनं देगः, मन्दिर, फल्चा, सतः दयेकल व दक्को राष्ट्रया अमूल्य सम्पत्ति खः । थ्व न्ह्याम्हय्स्यां नं दयेके ज्यू, छुंनं जाति, समुदायं दयेकेफु । व्यक्ति वा समुदायं दयेकूसा उज्वःगु सम्पत्ति धयागु व्यक्तिगत जुइमखु । छम्ह नेवाःनं देशय्मदु झ्याः दयेकल व राष्ट्रप्रति समर्पित जुल, राष्ट्रया सम्पत्ति जुल । अथ्यहे संखधर साख्वाःनं नेपाल सम्वत् राष्ट्रया नामय् स्वन, व राष्ट्रिय सम्पत्ति जुल । अथ्यहे देशय् गुलिनं ऐतिहासिक सम्पदात दु, व दक्कों दयेकूम्ह न्ह्याम्ह हे जूसां व राष्ट्रयागु जुइ, देशयागु जुइ । उकिं छम्ह नेवाःनं दयेकल वा स्वन धाःसा नं व नेवाःतय्गु जक जुइ मखु, सारा नेपाःमितय्गु जुइ । हरेक जात जाति ला थःगु वुद्धि विवेक क्षमता कथं देशया निम्तिं ज्या यायेगु व राष्ट्रयात व समर्पित यायेगु खः । संखधरं नं नेपाल सम्वत् धकाः छाय् नां तल धाःसा व राष्ट्रयात समर्पित यायेतहे व्यक्तिया नां मतसे देशया नामं सम्वत् स्वंगु खः । तर छम्ह नेवाःनं दयेकल वा पलिस्था यात धकाः नेपाल सम्वत्यात नेवारी सम्वत् धायेगु वा नेपाल सम्वत्यात मात्रै नेवाःतय्गु सम्वत् धकाः धायेमज्यू । थथ्य धायेगु धयागु गलत खः, साम्प्रदायिक खः ।

उकिं नेपालसम्वत्यात छख्य सरकारी मान्यता कायेधुंकाः व्यवहारय् छ्यलेगु व छ्ययेकेगु अभियानयात न्ह्यःने यंकेमाःसा, मेख्य नेवार सम्वत् वा नेवाःतय्गु जक सम्वत् धाइपिनिगु म्हुतुप्वाः तिकेमाः । छम्ह नेवाःनं स्वन धायेगुतुं नेवार सम्वत् जुइगु खःसा नेवाःतय्सं थौंतक्क दयेकातःगु देशय् दुनेया फुक्क सांस्कृतिक सम्पदातय्त छु धायेगु ? राष्ट्रया नामय् स्वंगु व पलिस्था याःगुया कारणं हे राष्ट्रिय सम्वत् वनं नेपाःया छगू जक मौलिक छगू जक सम्वत् खः । थुकियात राष्ट्रियता मान्यता व्यूगुया कारण व थुगु सम्वत्या प्रवर्तक संखधर साख्वाःयात राष्ट्रिय विभूतिया घोषणाया कारण धयागु हे सम्वतं कय्च्याःगु राष्ट्रियताया भावनात्मक व सम्वेदनशील पक्ष खः । थुकियात आत्मसात यानाः राष्ट्रियता वल्लाकेगु ज्या झीसं यायेमाः ।

More Stories Like this