'प्रधानमन्त्रीयात पार्टीं कारवाही यायेमाः’
येँ (झीगु स्वनिगः)
एकीकृत नेकपा (माआवादी)या महासचिव रामबहादुर थापा बादलं प्रधानमन्त्री नापं थःगु पार्टीया न्वकु डा. बाबु—राम भट्टराईयात भारतय् वने छन्हु न्ह्यः पार्टीया स्थायी कमिटीया मुँज्यां बिपा सम्झौता मयायेत तोकेयानाः हे निर्णय याःगु खँ न्ह्यथसें प्रमं पार्टीया निर्देशनयात अवज्ञा याःगुलिं अनुशासनया कारवाही जुइमाः धकाः माग यानादीगु दु । प्रधानमन्त्री भट्टराई नं गुगु कथं लगानी प्रवर्द्धन तथा सुरक्षा सम्झौता -बिपा) यात व पार्टी दुने अनुशासन उल्लंघन याःगुलिं आः कारवाही यायेमाः धकाः नेता बादलं धयादीगु खः ।
म्हिगः आइतवाः चितवनया भरतपुरय् जूगु बुद्धिजीवीतय्गु भेलाय् न्वंवासें नेता बादलं अथे माग यानादीगु खः । वय्कलं तत्काल हे सम्झौतयात खारेज मयात धाःसा देशय् ग्यानापुसे च्वंगु अवस्था वइ धयादिसें मधेसी मोर्चानाप याःगु सम्झौता, जनयुद्धया इलय् कब्जाय जूगु जग्गा लित बिइगु प्रकरण व ताःचा लःल्हायेगु विषय जुयाः बिपा सम्झौता तक वःगु इलय् पार्टीया छगू पक्षं अराजकता सडकय् क्यंगुलिं आः उकिया विरुद्ध खुलेजुयाः संघर्ष यायेगु जुइ धकाः नं धयादिल ।
