प्रधानमन्त्रीयात हाकूगु ध्वाँय्

राष्ट्रघाती बिपा सम्झौताया विरोधय् माओवादीया जबस मोर्चात छथाय् दन

येँ (झीगु स्वनिगः)

एकीकृत नेकपा -माओवादी)या १५ गू जनवर्गीय संगठन नापं जातीय मोर्चातय् नेता व कार्यकर्तातय्सं म्हिगः आइतवाः प्रधानमन्त्री डा. बाबुराम भट्टराई नापं भारतय् वनाः वःपिं मन्त्रीतय्त हाकूगु ध्वाँय् क्यंगु दु । भारतय् वनाः राष्ट्रघाती विपा सम्झौता राष्ट्रघाती धकाः ठहरयासें विरोध यानाः अथे म्हिगः अन्तर्राष्ट्रिय विमानस्थलं वयेवं हाकूगु ध्वाँय् क्यंगु खः । सलंसःम्ह एकीकृत माओवादीया कार्यकर्तातय्सं अथे हाकूगु ध्वाँय् क्यंगु खः । माओवादीया अखिल क्रान्तिकारी, किसान महासंघ, क्रान्तिकारी महिला संघ, आदिवासी जनजाति जातीय क्षेत्रीय महासंघ, बेपत्ता परिवार नापं थीथी कथंया जवस मोर्चाया म्हिगः आइतवाः मंकाः मुँज्या च्वनाः मंकाः कथं हे जारी याःगु विज्ञप्तिइ धयातःगु दु 'माओवादी व विपक्षी दलतय्सं दीर्घकालिन लिच्वः लाइगु सन्धि सम्झौता मयायेत निर्देशन व सुझाव ब्यूगुया अःखः विपा सम्झौता याःगु दु, नेपाःमि उद्यमी व व्यवसायीयात सुविधा व सहुलिय बियाः नेपाःया राष्ट्रिय अर्थतन्त्रया विकास यायेत बहः बिइमाःगु इलय् भारतीय व्यवसायीयात राष्ट्रं क्षतिपूर्ति बिइगु थें जःगु सर्तय् सम्झौया याःगु धैगु सन् १९५० या असमान सन्धि थें हे असमान राष्ट्रघाती सम्झौता याःगु दु ।

उकिं उगु सम्झौता तत्काल खारेज यायेमाः ।' बिपा साम्झौताया विरोधय् माओवादीया १५ गू जबस मोर्चात छथाय् दंगु खःसा आः उकियात निरन्तरता बियाः यंकी धाःगु दु । प्रधानमन्त्री डा. बाबुराम भट्टराई वंगु विहिवा ३७ म्हेसिया नेतृत्व यानाः भारत भ्रमणय् वनादीगु खःसा वय्कःपिं म्हिगः आइतवाः जक येँय् लिहां वःगु खः ।