नेपालय् बिपा सम्झौताया विरोध
प्रमयात हाकुगु ध्वाँय् क्यनीगु
येँ (सन्ध्या टाइम्स)/नेपाः व भारत दथुइ लगानी संरक्षण व प्रबर्द्धन सम्बन्धी सम्झौता (बिपा) य् हस्ताक्षर याःगु विरोधय् मातृका यादवं नेतृत्व यानाच्वंगु नेकपा (माओवादीं) प्रधानमन्त्री डा. बाबुराम भट्टराईयात हाकुगु ध्वाँय् क्यनीगु जूगु दु ।
भारत भ्रमणय् वनाच्वंम्ह प्रम भट्टराई थौं भ्रमण क्वचायेकाः नेपाः लिहां वइगु इलय् लँय् च्वनाः हाकुगु ध्वाँय् क्यनेगु तयारी यानाच्वंगु खँ सीदुगु दु।
बिपा सम्झौताय् हस्ताक्षर याःगु खँयात कयाः स्वय्म माओवादी दुने नं विरोध सुरु जुइधुंकूगु दु। उपाध्याक्ष मोहन वैद्य पक्षं सम्झौताया विरोध यासें प्रमया आलोचना याये धुंकूगु दु ।
वंगु शुक्रवाः भारतय् हस्ताक्षर याःगु उगु सम्झौताय् भारतया लगानीइ नेपालय् चायेका तःगु उद्योगत व्यावसायिक बाहेक मेमेगु कारणं बन्द जुल धाःसा उकिया क्षतिपूर्ति नेपालं पुला बीगु खँ उल्लेख याना तःगुलिं थ्व धइगु नेपाःया अर्थतन्त्र मुक्कं हे आः भारतया कब्जाय् छ्वयेगु कुतः खः धाःगु दु ।
'बिपा अन्तर्गत आन्दोलनया क्षतिपूर्ति बीम्वाः'
उद्योगमन्त्री अनिलकुमार झां नेपाः व भारत दथुइ जूगु लगानी संरक्षण व प्रबर्द्धन सम्बन्धी सम्झौता (बिपा) य् सामान्यतः मजदुर हड्ताल, बन्द व आन्दोलनया कारणं जुइगु क्षतिया क्षतिपूर्ति पुलेगु व्यवस्था मदु धयादीगु दु। शुक्रवाः जूगु उगु सम्झौताय् नेपाःपाखें वय्कलं ल्हाःचिं तयादीगु खः। थुज्वःगु सम्झौता नेपालं बेलायत, मौरिसस, फिनल्यान्ड लगायत खुगू मुलुकलिसे यायेधुंकूगु खँ न्ह्यथँसें मन्त्री झां भारतं नं विश्वया ७० गू मुलुकलिसे बिपा सम्झौता यायेधुंकूगु नापं मेगु १० गू मुलुकलिसे यायेगु तयारी यानाच्वंगु खँ न्ह्यथँसें थज्याःगु अवस्थाय् नेपालं उकथंया सम्झौता यानां छु हे समस्या मवइगु खँ कनादिल ।
भारतय् थौं संचारकर्मीतलिसे खँल्हासें नेपालं थुज्वःगु सम्झौता फिनल्यान्ड, बेलायत, मौरिसस लगायतया मुलुकनाप यायेधुंकूगु जानकारी बिसें अर्थमन्त्री बर्षमान पुनं थुगुसी भारतलिसे जूगु सम्झौताया ढाँचा दकलय् बांलाःगु दावी यानादिल। खास याना ततःधंगु संकट, युद्ध व विवादया अवस्थाय् लगानीया सुरक्षा बीत थुज्वःगु प्रावधान लागू जुइगु खँ नं वय्कलं स्पष्ट यानादिल ।
