स्वन्ति लिपा कांग्रेसया नेतात थःथःगु लँपुइ
येँ (सन्ध्या टाइम्स)/प्रमुख प्रतिपक्षी दल नेपाली कांग्रेसया भातृ संगठनत विघटन याःगु खँयात कयाः ब्वलनाच्वंगु विवादयात कयाः आः स्वन्ति नखः लिपा नेतात थःथःगु लँपु लिना वनीगु जूगु दु ।
समस्या समाधानया निंतिं धकाः कुतः याःसां आखिर खँ मिले मजूगुलिं अथे कांग्रेसया संस्थापन पक्षधर नेतात व बरिष्ठ नेता शेरबहादुर देउवा पक्षधर नेतात थःथःगु खँ ज्वनाः ब्यागलं ब्यागलं लँपु ज्वना वनीगु अवस्था वःगु दु धकाः कांग्रेसया छम्ह नेतां जानकारी बियादीगु दु ।
भातृ संगठनयात विघटन याःगु घटनायात कयाः कांग्रेसया बरिष्ठ नेता शेरबहादुर देउवां पार्टीया केन्द्रीय सदस्यं तकं राजीनामा बियादीगु खःसा उगु राजीनामा आः तक नं स्वीकृत मयाःनिगु नापं समस्या समाधानया निंतिं कुतः यानाच्वंगु जूसां सहमति जुइगु अवस्था मदया वनाच्वंगु दु। संस्थापन पक्ष व देउवा पक्षं थःथःगु कथं तयारी यानाच्वंगु दु। लिपांगु इलय् वयाः देउवां ला खुल्ला रुपं हे पार्टीया संस्थापन पक्षं थःत पेले यानाच्वंगु दु धकाः द्वपं बियादीगु दु। वय्कलं थःगु भावनाय् पार्टीया सभापति सुशील कोइरालां घाः लाकेगु ज्या यानाच्वंगु खँ नं कनेगु यानाच्वंगु दु ।
नेता देउवां थुकथंया दुःख प्वंकादीसां कोइराला पक्षं धाःसा उकियात वास्ता यानाच्वंगु मदु। बरु आः वइगु स्वन्ति नखः लिपा थःगु हे कथं वनेगु नितिं तयारी यानाच्वंगु नापं देउवा पक्षं नं थःगु हे कथं तयारी यानाः कार्यकर्तात भेला थेंज्याःगु ज्याझ्वःत यासें अभियान हे सञ्चालन यायेगु तयारी यानाच्वंगु खँ सूत्रं धाःगु दु। नेतात थःथःगु लँय् वनेत्यंगुलिं कांग्रेस कार्यकर्तात धाःसा चिन्तित जूगु दु ।
