न्ह्यू व रीतायात दान्यहिरा सिरपाः

यल (सन्ध्या टाइम्स)/ने.सं. ११३१ या दान्यहिरा सिरपाः नांजाःम्ह संगीतकार न्ह्यू बज्राचार्ययात व दान्यहिरा हःपाः सिरपाः गायिका मय्जु रीता महर्जनयात लःल्हात। नेपालभाषा एकेडेकिया ग्वसालय् म्हिगः थनया अशोक पार्टी प्यालेसय् जूगु सिरपाः लःल्हायेगु ज्याझ्वलय् नेपालभाषा एकेडेमिया चान्सलर संस्कृतिविद् सत्यमोहन जोशीं उगु सिरपाः लःल्हानादीगु खः। दान्य-हिरा सिरपाः न्यय्द्वः तकाया व दान्यहिरा हःपाः सिरपाःया नीन्याद्वः तकाया खः। दां सिरपाः सिरपाःया दाता यज्ञरत्न धाख्वालं लःल्हानादीगु खः ।

सिरपालं थःगु संगीत व थःत समाजं गुकथं स्वीकार यानाच्वंगु दु धइगु खँया लिसः बिउगु संगीतकार न्ह्यू बज्राचार्यं कनादिल। अथे हे दान्यहिरा हःपाः सिरपाः त्याकादीम्ह गायिका रीता महर्जनं निरन्तर रुपं थः न्ह्यज्यानाच्वनागु खँयात सुनां गुकथं कयाच्वंगु दु धइगु खँया मूल्यांकन एकेडेमी याना बिउगु कनादिल। ज्याझ्वलय् जनकवि दुर्गालाल श्रेष्ठं संगीतकार बज्राचार्यया बःचाहाकःगु म्हसीका बियादिसें पं. निष्ठानन्दया बज्राचार्यया छय् छुइ व उइपिं तकं भाषा ख्यलय् दुगु खँ कनादिल। न्ह्यू वज्राचार्य निष्ठानन्दया उइ खः। ज्याझ्वलय् वरिष्ठ गायक प्रेमध्वज प्रधानं रीता महर्जनया म्हसीका कनादीगु खः ।

ज्याझ्वलय् बज्राचार्यं थम्हं लय चिनागु म्येँ व महर्जनं थम्हं हाला तयागु म्येँ न्यंकाः ज्याझ्वलय् मनोरंजन यानादीगु खः। थः मदुम्ह अबु दानरत्न धाख्वाः, मदुम्ह तिरिमय्जु हिरादेवी धाख्वाः व थःगु हे नामं दाता यज्ञरत्न धाख्वालं नीस्वनादीगु 'दान्यहिरा सिरपा' नेपालभाषा ख्यः तब्याकेगु निंतिं निदँय् छक्वः संगीतकार व साहित्यकारपिंत पालंपाः बीगु याना वयाच्वंगु दु। ज्याझ्वलय् समालोचक लिसें वरिष्ठ बाखं च्वमि माधवलाल कर्माचार्ययात नं हनेगु ज्या जूगु खः ।

एकेडेमीया संस्थापक सदस्य सचिव मल्ल के. सुन्दरं लसकुस यानादीगु उगु ज्याझ्वलय् भाइस चान्सलर लक्ष्मण राजवंशीं सकसितं सुभाय् बियादिल। ज्याझ्वःया अन्त्यय् थीथी सांस्कृतिक ज्याझ्वः नं क्यंगु खः ।