छठ कुन्हु रानी पुखू चायेकेगु खँय् विवाद
येँ (सन्ध्या टाइम्स)/तराईया हिन्दूतय्सं न्यायेकीगु छठ पर्व कुन्हु येँया रानी पुखू चायेके बीगु वा मबीगु धइगु खँयात कयाः येँ महानगरपालिकाय् विवाद पिहां वःगु दु। येँ मनपाया वंगु असार ३१ च्वंगु १८ क्वःगु नगर परिषद्या बैठकं आवंलि सदियौंनिसें न्यायेका वयाच्वंगु पर्वय् बाहेक मेबलय् रानी पुखू चायेके मबीगु निर्णय याःगु खः। तर म्हीग छगू मधेसवादी संस्थाया प्रतिनिधि वयाः छठ कुन्हु रानी पुखू चायेका बी माल धकाः इनाप यायेवं मनपां हानं चायेकेगु निर्णय याःगु दुसा उगु निर्णययात कयाः विवाद पिहां वःगु खः ।
मनपां थःगु पुलांगु निर्णय हिउगु खँयात विरोध यासें अन दुगु दलीय संरचनाया कांग्रेस प्रतिनिधि भगवान शाक्यं निर्णय हिलेगु ज्या एमाले प्रतिनिधिया कारणं जूगु द्वपं बियादीगु दु। एमालेया प्रतिनिधि रामवीर मानन्धरं मेगु दलया प्रतिनिधित मदुगु इलय् छठ कुन्हु रानी पुखू चायेकेगु निर्णय याके बिउगु द्वपं शाक्यं बियादीगु दु ।
