नेता भिंसा देय्या कल्याण जुइ

डि.आर.खड्गी

झीगु जःलाखःला देय् भारतया आसाम, त्रिपुरा, मिजोरम, मेघालय, अरुणाञ्चल व उत्तराखण्डय् अप्वः नेपाली मूलया नागरिक बसोबास यानाच्वंगु दु। थ्व राज्यया कृषि क्षेत्रय् खूब मेहनत व परिश्रम यानाः कृषि उत्पादन वृद्धि यायेगुली नेपाली मूलं तिबः बियाच्वंगु दु। विशेष यानाः उत्तर पूर्वया राज्य विकास यायेगुली भारत सरकारं ध्यान बियाच्वंगु मदु, गुलि कि मेमेगु राज्यय् ध्यान बियाच्वंगु दु। उत्तर पूर्व राज्य विकास यायेगुली ध्यान मबिसे यथास्थिति तया तयेत भारत सरकारं खेल म्हिताच्वंगु सीदु। भारत सरकारं उत्तरपूर्वी राज्यया विकासय् ध्यान मतःगु मुख्य कारण राजनीति खः। थ्व राज्यय् अप्वः नेपाली मूलया नागरिक व आदिवासी जनजाति बासोबास यानाच्वंगुलिं अन भारतया ध्यान मवं। छाय् धाःसा थ्व राज्य मेमेगु राज्य थें विकास जुल धाःसा स्थानीय आदिवासी जनजाति स्वयाः नं नेपाली मूलया नागरिकया जीवनस्तर थहां वइगुलिं खःसा मेखे नेपालीतय्गु चेतनास्तर थहां वयाः राजनीतिक रुपं न्ह्यज्याइ ला धकाः नं खः। भारतं विकास यायेगु त्वःताः उत्तर पूर्व राज्यया जनतायात शोषण व दमन यानाच्वंगु जक दु। बरु भारत सरकारं साम्प्रदायिक दंगा याकाः नेपाली मूलया नागरिकतय्त विस्थापित यायेगु कासा म्हिताच्वंगु खनेदु। उकिं गबलें आसाम गबलें मेघालय व मेमेगु राज्यं नेपाली मूलया नागरिक विरुद्ध आन्दोलन याकाच्वंगु दु। वास्तवय् उत्तर पूर्वया राज्यय् स्थानीय आदिवासी जनजातिं याये मफुगु ज्या कृषि क्षेत्र व खानी क्षेत्रय् नेपाली मूलया नागरिकं कडा परिश्रम यानाः भारतया आर्थिक स्तर वृद्धि यायेगुली खुब ग्वाहालि यानाच्वंगु दु। भारतय् नेपाली मूलया नागरिकं तसकं परिश्रम यानाः आर्थिक सुधार यायेगुली ग्वाहालि यानाच्वंसां नेपाली मूलया नागरिकयात हे दुःख, कष्ट बियाच्वंगु दु। यदि नेपाली मूलया नागरिकं भारतीय स्वार्थय् घाः लाइगु ज्या यानाच्वंगु खःसा उमित सजाय बिउसां झीत आपत्ति मदु। उत्तर पूर्वया राज्यय् गुलि नं नेपालीतय्त लीगु ज्या यानाच्वन इपिं फुक्क सिधा साधा व परिश्रम याइपिं नेपालीत खः ।

उत्तरपूर्व राज्यया आदिवासी जनजातियात दिल्ली प्रशासन व मारवाडी व्यापारीं शोषण यानाच्वंगु दु। तर दिल्ली सरकार व राज्य सरकारं धाःसा अःखः नेपाली नागरिकं स्थानीय जातिया ज्या लाकाच्वन धकाः उक्से यानाः साम्प्रदायिक दंगा याकेगु स्वयाच्वन। उत्तरपूर्वया राज्यं साम्प्रदायिक दंगा याकाः नेपाली मूलया नागरिकतय्त विस्थापित यानाच्वंगु जक मखु हत्या, हिंसा व अपहरण यानाः दुःख नं बियाच्वंगु दु। यदि थज्याःगु षड्यन्त्र भारतया नागरिक विरुद्ध जुल धाःसा भारत सुंक च्वनी ला? भारतया भूमिइ नेपाली मूलया विरुद्ध बारम्बार षडयन्त्र जुयाच्वंसां थनया नेतातयसं थःगु म्हुतुइ धौ फिनाच्वन। थुकिया अर्थ थनया नेतात स्वार्थी, लोभी व विदेशीया ईशाराय् प्याखं हुलीपिं खः धकाः प्रस्ट जू।
भारतया राज्यत मध्ये अति नकारात्मक नागरिक खः विहारी। विहारीतय्त विश्वया जनतां जक मखु स्वयं भारतया मेमेगु राज्यया जनतां नं घृणा व अपहेलना याः। तर थ्व नं सत्य खः कि विहारीत गन गन वन अन अनया वातावरण सामाजिक रुपं दुषित यानाः सिधा साधा जनताया मानसिकताय् हे नकारात्मक लिच्वः लाकाच्वंगु दु। अति नकारात्मक सोच दुपिं विहारीत नेपालय् शानं च्वनाच्वंगु जक मखु राजनीतिया नामं नेपाःयात थःगु पकडय् नं कयाच्वंगु दु। गुलि गुलि विहारीत राजनीतिया नामं न्ह्याः वयेगु यानाच्वन उलि हे देश बर्वाद जुजुं वनाच्वन। दिल्लीया गृह मन्त्रालयय् १२ बुँदे सम्झौता याना वसांनिसें विहारीतय्सं चांचां नेपाःया नागरिकता कायेगु यानाच्वंगु खः। भारतीय मूलया मारवाडी व विहारीतय्सं व्यापारय् जक मखु राजनीतिइ नं थःगु वर्चस्व कायम यायेधुंकल। भारतं विहारीतय्त नेपालय् छ्वया हःगु छगू कारण नेपाः कब्जा यायेगु खःसा मेगु विहारय् शान्ति व आनन्द हयेत खः। थौंकन्हय् विहारय् शान्ति व आनन्द जुयाच्वंगु कारण नं अनया नकारात्मक नागरिक नेपाः वयाच्वंगुलिं हे खः। थौंकन्हय् हत्या, हिंसा, गुण्डागर्दी, चन्दा आतंक व अपहरण याइपिं विहारीत नेपालय् वयाः 'टेन्सन' बियाच्वंगु दु ।

नितिशकुमार मुख्यमन्त्री जुइ न्ह्यः विहार विकास मजूगु छगू कारण ला हत्या, हिंसा, लुटपात, अपहरण व चन्दा आतंकं जनता आतंकित जुयाच्वंगुलिं खःसा मेखे उद्योगपतितय्सं विहारय् मच्वँसे मेमेगु राज्यय् वनाः लगानी यायेगु व उद्योग संचालन याःगुलिं खः। मेगु कारण धइगु जातीय राजनीतिया नामं समाजयात हे साम्प्रदायिक द्वन्द्वय् यंकेगु यानाच्वंगुलिं खः। विहारया राजनीति असक्षम, स्वार्थी व खराब नेतातय्सं संचालन यानाच्वंगुलिं इमिसं राज्यया प्रमुख पदय् सक्षम व्यक्तियात नियुक्त यायेगु त्वःताः गुण्डागर्दीं वःपिं नेता व कार्यकर्तातय्त राजनीतिक पदय् नियुक्त यात। मभिंपिं नेतातय्सं छखे जनतायात आतंकित यानाच्वनसा मेखे राज्यया धुकू स्वाहा यानाच्वन। जब विहारय् नितिशकुमार मुख्यमन्त्री जुल विहारया रुप हे हिल। मुख्यमन्त्री नितिशं विहारया श्रोत, साधन व जनतायात ठीक तरिकां उपयोग याकाः विहारया विकास यानाच्वन। मुख्यमन्त्री नितिश सत्ताय् वयेसात दकलय् न्हापांगु ज्या विहारयात गुन्डाराजं मुक्त यायेगु लागि धमाधम गुण्डातय्त नियन्त्रणय् काल। नितिशं गुम्हं गुण्डायात मुठभेदया नामं खतम यातसा गुलिसित जेलय् कुना बिल। करिब निसःम्ह गुण्डातय्त ठीक यायेसातकि बाँकी गुण्डात मेमेगु राज्यय् बिसिउँ वन। उकी मध्ये गुलिं नेपालय् नं वल। नितिश कुमारं फुक्क जातजातिया विकासया लागिं धकाः विशेष ज्याझ्वः हयाः जनतायात शान्ति व आनन्द बियाच्वंगु दु। विहारया घटनां प्रस्ट जू, यदि सत्ताय् भिंपिं मनूत वने फत धाःसा देय्यात याउँक विकास यायेफु धयागु खँ। तर झीगु देशय् धाःसा भिंपिं मनूत सत्ताय् थ्यनीगु लक्षण हे खने मदु ।

More Stories Like this