भारतीय लगानीयात सुरक्षाया ग्यारेन्टी

नेपालय् सञ्चालन जुयाच्वंगु भारतीय लगानीतय्त सुंपाखें खतरा दुसा व माओवादीपाखें जक खः। आः वहे माओवादी सरकारया प्रधानमन्त्रीयात 'नेपालय् भारतीय लगानी सुरक्षित जुइ, मजुल धाःसा नेपालं क्षतिपूर्ति पुला बी' धइगु सम्झौताय् हस्ताक्षर याकेत भारत ताःलाःगु दु। माओवादी गुरिल्लातय् कारणं नेपालय् च्वंगु थःपिनि लगानी असुरक्षित जुइवं वंगु झिदँ न्ह्यः हे भारतं नेपाः समक्ष प्रस्ताव यानातःगु लगानी सुरक्षा सम्बन्धी थ्व सम्झौताय् आः माओवादी सरकारया हे प्रधानमन्त्रीं हस्ताक्षर यायेमाःगु केवल संयोग जक मखु ।

लगानी सुरक्षा सम्बन्धी थ्व सम्झौता द्विपक्षीय खः। उकिं नेपालय् भारतीय लगानीयात गज्याःगु सुरक्षा दइगु खः भारतय् नेपाली लगानीयात नं वहे सुरक्षा दइ। तर भारतय् नेपाली लगानी धइगु हे मदुगु कारणं थ्व सम्झौताया यकःति लबः नइपिं भारतीय उद्योगपतित जक खः। नेपालय् भारतीय लगानीकर्तातय्त आकर्षित यायेगु लागिं सरकारं थज्याःगु सम्झौता यायेमाःगु खः। तर नेपालय् भारतीय लगानी दुहां मवःगुया मू कारण धाःसा मेपिं मखुसें स्वयम् माओवादी हे खः। भारतीय उद्योगयात निशाना दयेकाः माओवादीं गतिविधि याना हःगु कारणं हे उपिं नेपाः वयेत ग्याःगु खः। थ्व सम्झौतां मेपिं मखु स्वयम् माओवादी नीतिया विषयय् धाःसा न्ह्यसः थनीगु निश्चित दु। छखे भारतयात विस्तारवादी धकाः वयागु लगानीइ निशाना तयेगु, मेखे वहे भारतया लगानीयात क्षतिपूर्ति समेतया ग्यारेन्टी बियाः सुरक्षित यायेगु। थ्व माओवादीया छु नीति खः? न्ह्यसः दनीगु स्वाभाविक दु ।

More Stories Like this