नेपाल संवतया न्ह्यलुवाःतय्त हनीगु
येँ (झीगु स्वनिगः)
नेपाल संवतया आन्दोलनय् ज्वःमदुगु योगदान यानादीपिं पद्मरत्न तुलाधर, मल्ल के सुन्दर व नेपाल संवतया प्रवर्त्तक शंखधर साख्वाःया किपाः न्हापांखुसि सार्वजनिक यानाः शंखधरया विश्व न्यंकं म्हसीकेगुलिइ योगदान याःगु ल्याय्म्ह पुचः थिमियात थुगुसी नेपाल संवतया न्हूदँ खुन्हु थिमिइ हनीगु जूगु दु । राष्ट्रिय विभूति शंखधर साख्वाः प्रतिष्ठानपाखें प्रधानमन्त्रीया मूपाहांसुइ जुइगु विशेष ज्याझ्वलय् अथे हनेज्या यायेत्यंगु खः ।
उगु प्रतिष्ठानं नेपाल संवतया बारे दुग्यंक अनुसन्धान यानाः च्वयादीम्ह इतिहासकार भुवनलाल प्रधानयात नेपाल संवत् ११२२ सं नं हनेज्या याये धुंकूगु दु । उगु प्रतिष्ठानं दँय् दसं न्हूदँ खुन्हु शंखधर साख्वाःया झ्वाताय् स्वांमाः क्वखायेकेगु कथं सरकार प्रमुखयात मूपाहां कथं ब्वनाः विशेष समारोह यायेगु यानाः वयाच्वंगु दु ।
