थिमिइ ने.सं.या प्रवर्त्तक शंखधर संग्रहालय दयेकेगु

श्रीकृष्ण महर्जन

नेपाःया राष्ट्रिय संवत् नेपाल संवत्या न्हूदँ ११३२ वयाच्वंगु दु । नेपाल संवतया प्रवर्त्तक शंखधर साख्वाःया किपाः व झ्वाता न्हापांनिसें सार्वजनिक जूगु खयेमाः धकाः अप्वः मनूतय्सं अनुमान याःगु जुइफु । बास्तवय् अथे मखु नेपाल संवत्या प्रवर्त्तक शंखधर साख्वाःया मूर्ति न्हापा पशुपति लागाय् दुगु धकाः जक मनूतय्सं धायेगु यानाः वयाच्वंगु खःसा दक्ले न्हापां थिमिया 'ल्यायम्ह पुचः' पाखें नेपाल संवत ११०८ पाखे जक सार्वजनिक याःगु खः । व सिबें न्ह्यः शंखधरया किपाः सार्वजनिक मजूगु खः । अथे थिमिया ल्याय्म्ह पुचःपाखें शंखधरया किपाः सार्वजनिक यायेवं दँय् दसं उगु किपाः पिहां वयाच्वंगु दु । अथे हे शंखधरया झ्वाता दक्ले न्हापां थिमिइ हे तयेगु ज्या जूगु दु ।

अथे झ्वाता तयेगु ज्या नेपाल संवत् ११२२ सं जूगु खः । अनंलिपा थाय् थासय् शंखधरया मूर्ति पलिस्था यायेगु ज्या जूगु खः । शंखधर नाप स्वापू दुगु कथंया ज्वःमदुगु ज्या न्हापांखुसि यायेगु झ्वलय् आः हाकनं थिमिइ शंखधरया नामं संग्रहालय दयेकेगु तयारी यानाच्वंगु दु । उगु संग्रहालय दयेकेगु नितिं राष्ट्रिय विभूति शंखधर साख्वाः प्रतिस्थान थिमिपाखें तयारी यानाच्वंगु दु । उकिया नितिं माःगु कथं डिजाइन नं जुइ धुंकूगु दुसा मध्यपुर थिनि नगरपालिकां ५० लाख तकाया ब्यवस्था याये धुंकूगु दु । अथे हे ३ आनाया जग्गाया नं ब्यवस्था जुइ धुंकूगु दु । उगु संग्रहालयसं शंखधर नाप स्वापू दुगु सफू, च्वसू निसें थीथी कथंया शिलापत्र तकं तयेगु जुइ धकाः धाःगु दु । शंखधरया विषयसं अध्ययन याइपिनिगु नितिं छगू बांलाःगु थाय् जुइ धकाः धाःगु दु । संभवतः वइगु न्हूदँखुन्हु हे शंखधर संगं्रहालयया शिलान्यास जुइ धकाः प्रतिष्ठानं धाःगु दु ।