बिपा सम्झौता राष्ट्रघाती : खनाल

सम्झौता विरुद्ध आन्दोलन यायेगु ख्याच्वः

येँ (झीगु स्वनिगः)

एमालेया नायः झलनाथ खनालं भारत सरकारलिसे प्रधानमन्त्री डा. बाबुराम भट्टराई नं यानादीगु बिपा सम्झौता अर्थात घिपक्षय लगानी संरक्षण सम्वन्धी सम्झौता राष्ट्रघाती खः धकाः धयादीगु दु । म्हिगः शनिवाः येँया नयाँ नैकाप लागाय् न्हूदँ, स्वन्ति नखः, छठ व इदया लसताय् ग्वसाःग्वःगु चियापान ज्याझ्वलय् न्वंवासें नेता खनालं अथे धयादीगु खः । वय्कलं राष्ट्रवादी खँ ल्हाइम्ह प्रधानमन्त्री भट्टराई नं भारतया नयाँ दिल्लीइ 'प्वंकाबिल' धकाः धयादीगु दु । वय्कलं राष्ट्रवाद नायाः वन धकाः नं टिप्पणी यानादिल । नेता खनालं धयादिल 'न्हिया न्हिथं हे राष्ट्रियताय् तसकं खँ ल्हानाः जुइम्ह प्रधानमन्त्री डा. बाबुराम भट्टराईया राष्ट्रियता भारतय् थ्यंकाः नायाः वंगु दु । अन यमुना खुसिं चुइका यंकल ।' राष्ट्रविरोधी फुक्क सम्झौतायात एमालें खुलेजुयाः विरोध यायेगु जुइ धकाः नं धयादिल । नेपालय् लगानी दुकायेगुसिबें नं भारतयात लय्तायेकेगु नितिं अथे बिपा सम्झौता यानादीगु खः धकाः नायः खनालं स्पष्ट यानादिल ।

प्रधानमन्त्री भट्टराई नं नेपाःया अर्थतन्त्र व राष्ट्रियतायात घाट यायेगु ज्या याःगु दु धयादिसें आः आन्दोलन यायेगु जुइ धकाः ख्याच्वः नं नायः खनालं बियादिल । वय्कलं धयादिल 'देशया अर्थतन्त्रया नितिं वय्कलं छगू घाट याःगु दु । थ्व नेपाःया सार्वभौमसत्ताया विरुद्ध खः । पुलांम्ह प्रधानमन्त्री खनालं थः हे प्रधानमन्त्री जुयागु इलय् नं भारत पक्षं उगु बिपा सम्झौता यायेत कुतः याःगु खः तर थः राष्ट्रिय सहमति मजुइकं दीर्घकालिन महत्वया सम्झौता मयायेगु धकाः अडान कयागु खः धकाः स्पष्ट यानादिल । भारतं उगु सम्झौता यायेत थ्वसिबें न्ह्यःया स्वंगू सरकारया कारणयात नं प्रस्ताव तःगु खःसा विवादास्पद जूगुलिं उकियात अस्वीकार यानाः वयाच्वंगु खः । बिपा सम्झौता धैगु नेपालय् भारतीय उद्योग गैर व्यावसायीक बाहेकया कारणं उद्योग बन्द जुल धाःसा उकिया क्षतिपूर्ति नेपाल सरकारं पुलेगु धकाः उल्लेख यानातःगु दु । नेपाःमितय्सं संचालन यानाच्वंगु उद्योगयात हे नेपाल सरकारं अज्वःगु कथंया व्यवस्था यानातःगु मदु । अथे हे नेपाःयात फाइदा दइगु दोहोरो कर चीकेगु सम्झौयातया धाःसा भारत सरकारं गृहकार्य मगाःनि धकाः आःयात सम्झौता मयाःगु खः ।