दान्यहिरा सिरपाः ११३१ लःल्हात
साहित्य व संगीत ख्यलय् योगदान याइपिंत हपाः स्वरुप दँय्दसं बिइगु प्रतिष्ठामूलक दान्यहिरा सिरपाः शनिवाः छगू ज्याझ्वःया दथुइ लःल्हात ।
नेपालभाषा एकेदेमिया तत्वाधानय् नीस्वनातःगु दान्यहिरा सिरपाः थुगुसी संगीतकार एवं गायक न्ह्यू वज्राचार्य व दान्यहिरा हपाःसिरपा गायीका रीता महर्जनयात लःल्हाःगु खः । यलया अशोक पार्टी प्यालेसय् जूगु छगू ज्याझ्वलय् नेपालभाषा एकेदेमिया चान्सलर सत्यमोहन जोशीं सम्मानित व्यक्तित्वतय्त दसिपौ लःल्हानादीगु खः । अथेहे सिरपाःया दाता यज्ञरत्न धाख्वाःजुं बज्राचार्ययात सिरपाः स्वरुप ५०,०००/- तका दां व महर्जनयात २५,०००/- तका दां लःल्हानादीगु खः ।
ज्याझ्वलय् एकेदेमिया संस्थापक सदस्य सचिव मल्ल के. सुन्दरं लसकुस यानादीगु खःसा सिरपाः त्याकादीम्ह भाजु वज्राचार्य व मय्जु महर्जनया बारे छसिकथं जनकवि दुर्गालाल श्रेष्ठ व वरिष्ठ गायक प्रेमध्वज प्रधानं न्ववानादीगु खः । एकेदेमिया चान्सलर सत्यमोहन जोशीया सभापतित्वय् जूगु ज्याझ्वलय् सिरपाःया दाता धाख्वा, गायिका इन्दिरा जोशी लगायतं नं थःगु नुगः खँ प्वंकादीगु खः ।
ज्याझ्वलय् सिरपाः त्याकादीपिं वज्राचार्य व महर्जनं म्ये हालादीगु खःसा उगु हे ज्याझ्वलय् सांस्कृति ज्याझ्वः नं न्ह्यब्वःगु खः ।
