संकल्प प्रस्ताव महःसा संघर्ष
सरकारं सर्वोच्चया मानहानी याःगु द्वपं
यें (सन्ध्या टाइम्स) / यदि थःपिंसं हयेत्यनागु संकल्प प्रस्तावयात सदनय् छलफल मयात धाःसा माओवादीं उकिया विरुद्ध आन्दोलन तच्वयेकेगु ख्याच्वः बिउगु दु । थौं सुथय् च्वंगु माओवादी केन्द्रीय सचिवालयया बैठकं उगु निर्णय याःगु खँ माओवादी प्रवक्ता दिनानाथ शर्मां 'सन्ध्या टाइम्स'यात कनादिल ।
सरकार समर्थित २२ दलं राष्ट्रपति विरुद्ध वयेत्यंगु संकल्प प्रस्ताव सदनय् यंकेम्वाः धकाः धयाच्वन नि धइगु न्ह्यसःया लिसलय् वय्कलं सदनय् वयेधुंकूगु विषयय् सहलह मयायेगु धइगु घोर तानाशाही ज्या खः धासें संसदय् सहलह याये मखु धायेगु संविधानया नं अःखः खः धयादिल ।
संकल्प प्रस्ताव बारे दलगत रुपं दलतय् बिस्कं बिस्कं धारणा दयेफु धासें वय्कलं न्ह्याथे यानाः जूसां नं संकल्प प्रस्तावय् सहलह यायेगु निंतिं माओवादीं कुतः यायेगु खँ कनादीगु दु ।
राजनीतिक पार्टीतय्सं संकल्प प्रस्ताव बारे क्यंगु असहमति तानाशाही प्रवृत्तिया चिं खः धासें थुकिया विरोधय् थःपिंसं सतक व सदनय् आन्दोलनया ग्वःफय् हयेगु ख्याच्वः नं वय्कलं बियादिल ।
संकल्प प्रस्तावयात सदनय् मयंकुसे हे संसद अधिवेशन क्वचायेकेगु खँ वयाच्वंगु बारे माओवादी बिचाः न्यनाबलय् वय्कलं थ्व राजनीतिक दलतय् तानाशाही प्रवृत्ति खः धयादिल ।
माओवादीं वर्खास्त याःम्ह प्रधानसेनापतियात वर्तमान सरकारं निरन्तरता बीगु खँ धयाच्वंगु सम्बन्धी मेगु न्ह्यसःया लिसलय् वय्कलं सर्वोच्च अदालतय् विचाराधीन जुयाच्वंगु विषययात कयाः सरकारं निर्णय यायेगु धइगु सर्वोच्च अदालतया मानहानी जक मखु स्वतन्त्रप्रेमी नेपाःमि जनताया समेत अपमान जुइगु बिचाः नं वय्कलं प्वंकादिल ।
संकल्प प्रस्ताव बारे छुं न्हूगु ज्याझ्वः माओवादीं हइगु खः ला धकाः न्यनागु न्ह्यसलय् वय्कलं माओवादीया केन्द्रीय सचिवालयया बैठक जारी हे जुयाच्वंगुलिं थुकिया बारे ठोस निष्कर्ष छन्हु निन्हु दुने हे वइगु खँ कनादिल । वर्तमान सरकार व राजनीतिक दलत फासीवादी चरित्र कथं न्ह्यानाच्वंगु द्वपं बिसें वय्कलं उकियात थःपिंसं सशक्त रुपं प्रतिकार व भण्डाफोर यायेगु खँ नं कनादिल ।
केन्द्रीय सचिवालयया बैठकय् संविधानया थीथी बुँदायात कयाः सहलह जूगु जानकारी बिसें वय्कलं जनताया संविधान दयेकेगु ज्याय् थःपिं लगे जुयाच्वनागु दु धयादिल ।
आःयात संविधानया थीथी विषययात कयाः सहलह जुयाच्वंगु जानकारी नं वय्कलं बियादिल ।
२२ दलं संकल्प प्रस्ताव सदनय् हयेके बी मखु धायेवं सभामुख सुभाष नेम्बाङं थौं संवाद न्ह्याकादीगु दु ।
