सगरमाथाय् चःबि दयेकेगु माग !
येँ (सन्ध्या टाइम्स)/देशय् स्वास्थ्य सम्बन्धी जनचेतना थुलि कम दु कि सर्वसाधारण मनूतय् छेँय् छेँय् तकं चःबि तये फुगु मदुनि। थज्याःगु इलय् पर्यावरण सम्बन्धी छगू संस्थां विश्वया दकलय् तजाःगु च्वापुगुँ सगरमाथाय् चःबि तया बी माल धकाः सरकारयात इनाप याःगु दु। सगरमाथा गइपिं मनूतय्सं अन खुल्ला रुपं हे च्व-खि फाना थकीगु कारणं सगरमाथा तसकं फोहोर जूगुलिं अन छगू चःबि हे तया बिउसा फोहोर कम जुइगु बिचारं इको हिमाल नांगु संस्थां थ्व माग याःगु खः ।
उगु संस्थाया निर्देशक फिन्जो शेर्पां कनादी कथं सगरमाथाय् मनुखं उत्पादन याइगु फोहोर छगू समस्या ला खः तर चःबि तया बिल धाःसा थ्व समस्या समाधान याये फइ। सगरमाथा गइपिं गुलिखे मनूतय्सं च्व-खि फायेगु लागिं 'ट्वाइलेट क्यान' नं ज्वना वनेगु याइ तर उकियात क्वय् तुं लित धाःसा हइ मखु। उकिं अन निगू वा स्वंगू ति चःबि दयेका बी फत धाःसा फोहोरया समस्या म्हो जुइ। अन दयेकीगु चःबि जाल कि हानं क्वय् हयाः हिले फइगु कथंयागु जुइ धाःगु दु ।
नेपाःपाखें सगरमाथा गइपिं आरोहीतय्सं यक्व हे फोहोर वांछ्वया थकीगुलिं सगरमाथायात 'संसारया दकलय् तजाःगु थासय् च्वंगु डम्पिङ्ग साइट' तकं धायेगु याः। अन न्यय्दँ न्ह्यवंनिसेंया फोहोर मुनाच्वंगु दु ।
