भ्रम निवारण याये

बुद्ध साय्मि

प्रतिक्रिया

नेवाःत जुगंनिसें शासनय् थ्यनेमफुगु ला द हे दु। देय्या प्रशासनय् छुं थाय् कयाच्वंगु खः व नं हिउपाः वयेवं झन झन च्वतुना वनाच्वन। नापं सीमदयेक जातिया अस्तित्व हे न्हना वनाच्वन। नकतिनि वंगु विराट नेपालभाषा साहित्य सम्मेलनया न्यय्दँ बुदिंबलय् थ्वया छुं दसु ब्वयेत जिं कुतः यानागु खः ।

- उच्च पदया झिंन्याम्ह मखु, स्वीगुम्ह पदाधिकारीतय्गु सरुवाया धलखय् स्वीस्वम्ह ब्राम्हण, स्वम्ह क्षेत्री, छम्ह तराई ब्राम्हण, छम्ह चौधरी, नेवाः वृन्दा हाडा छम्ह जक दु। (श्रोत "नयाँ पत्रिका" २०६८ भाद्र २ गते)

- नेपाल राष्ट्र बैंकया खुल्ला प्रतियोगिता झिंन्यागू संख्याय् सिफारिस जूपिं झिंन्याम्ह ब्राम्हणत जक क्षेत्री तकं मदु। (गोरखापत्र २०६८ भाद्र २ गते)

- अथे हे स्थानीय निकाय काठमाडौं महानगरपालिकाय् खुल्ला प्रतियोगिताय् झिंन्यागू संख्याय् सिफारिस जूपिं झिंन्याम्हय् झिम्ह ब्राम्हण, प्यम्ह क्षेत्री, छम्ह नेवाः, फुक्कं पिनेयापिं। थ्वया अर्थ स्थानीय निकायया समस्या अले अनया जनताया पीर मर्का छक्वलं वयाः पिनेयापिंसं समाधान याये थाकुइफु। जिगु मनसाय खुँयात खीर, साधुयात सिखः मजुइमा, न्याय याकनं जुइमा धइगु जक खः ।

थ्वयात अन्यथा मकाये। थ्वहे खँय् पिनेया नेवाःत झिंप्यम्ह व थनया छम्ह ब्राम्हण वःसा खँ मेगु हे जुइफु। प्रा. नर्मदेश्वर प्रधानजुं स्वनिगः दुने व स्वनिगलं पिनेया नेवाःतय्त विभेद यात धइगु खँ गुगु च्वयादिल, जिगु मनसाय अथे कदापि मखु। धाथें धायेगु खःसा थौं नेवाःतय्गु गौरव स्वनिगलं पिनेया नेवाःतय्सं हे ल्यंकाच्वंगु दु। दबुलिं जिं हनेबहःम्ह सर्वोच्च अदालतया पुलांम्ह प्रधानन्यायाधीस रामप्रसाद श्रेष्ठया नां सगर्वं कायेगु याना वयाच्वना। थौंया प्रतिस्पर्धात्मक युगय् व्यापार व मेमेगु क्षेत्रं पिनेया नेवाःतय्सं मेपिंनाप धेंधेंबल्लाः यानाच्वंगु दु। पिनेयापिं नेवाःत वयाः हे झीगु ल्याःचाः ल्यंकाच्वंगु दु। थनया न्हूगु पुस्तात आपाः धयाथें देशंपिने वनेगु हे जक ताः स्वयाच्वनी ।

उलि जक मखु, तुलनात्मक रुपं न्हना वनेत्यंगु नेवाःतय्त गुकथं सशक्तीकरण यायेगु खः, इमि दथुइ एकताया भावना गुकथं ब्वलंकेगु खः, थुखेपाखे जिमिगु पार्टी "नेपाः राष्ट्रिय पार्टी" सजक जुयाच्वंगु दु। अनेकथं थःगु भूमिं पिहां वनेमाःपिं नेवाःतय्गु राजनैतिक हक व अधिकार सुरक्षित यायेगु निंतिं थःगु अवधारणा न्ह्यब्वयाच्वंगु दु। वया छुं छुं झ्वः क्वय् बियाच्वना ।

नेवाः प्रदेशं पिने च्वंपिं वा लाःपिं नेवाःतय्सं नेवाः प्रदेशय् भोट बीगु जक मखु, थनया उम्मेदवार जुयाः मुख्य मन्त्री तक जुइ दइगु प्रावधान दु ।

नेवाः राज्य गठनया (छगू नमूना):
राज्यसभा १०० म्ह सदस्य संख्या जुइ (नमूनाया निंतिं जक) उकी प्रत्यक्ष चुनावं ४९ म्ह त्याना वइ। जातीय सामानुपातिक सूचि कथं ५१ म्ह ल्यया वइ। थ्व ५१ म्हय् ४० म्ह नेवाः जुइमाः। थ्व ४० म्हय् नं २० म्ह नेवाः राज्य दुनेया नेवाः व २० म्ह नेवाः राज्यं पिनेया नेवाः जुइमाः। बाँकी ११ म्ह (नेवाः बाहेकया) जनजातिपाखें ल्यया वइ।
च्वय् न्ह्यथनागु नेपाः राष्ट्रिय पार्टीया अवधारणां स्पष्ट जुइ - जिमिगु ध्यान फगत स्वनिगः दुनेया नेवाःत जक मखु। समग्र नेवाःतय्गु जिमित चिउताः दु। नापं थःगु जातीय अस्तित्व व जातीय गर्व ल्यंकाः मेमेगु जातियागु चिउताः थ्व पार्टीं तयाच्वंगु दु। जनजाति, तराई, मधेशी, थारु, दलित जक मखु, खसब्राम्हणया नं चिउताः कयाः अवधारणा ब्वलंगु खः। (स्वयादिसँ - नेपाः राष्ट्रिय पार्टीया राज्य पुनर्संरचना व शासकीय स्वरुपया अवधारणा)
व्यक्तिगत रुपं धायेगु खःसा जीवनया बछि ई लजगाःया झ्वलय् स्वनिगलं पिने फुकागु दु। जिमि कूल जहान ल्याः प्यम्ह खः। न्हापाया प्यंगू जिल्ला जक मखु प्यंगू अञ्चल हे जिमिगु जन्मस्थल खः। जिं छुं दुरासय वा अपहेलनाया भावं न्ववानागु मखु। अथे जूसां तबि थुकिं सुइगुं भावनाय् घाः जूवंगु दुसा जितः तसकं दुःख ताः ।

More Stories Like this