अन्ततः अमेरिकां गद्दाफीयात नं सिधयेकल

लिबियाया पूर्व शासक कर्णेल गद्दाफीया अन्त्य आखिर हत्यापाखें जूगु दु। उत्तर अफ्रिका व पश्चिम एशियाय् थगुनेनिसें वःगु स्वतन्त्रताया फसं ट्युनिसिया व इजिप्ट लिपा शासकयात क्वःथःगु स्वंगूगु देय् लिबिया जूगु दु। थुकी मध्ये शासकया हे हत्या जूगु देय् धाःसा लिबिया खः। लिबिया लिपा आः विश्वया ध्यान यमन व सिरियापाखे वनाच्वंगु दु।
लिबियाय् कर्णेल गद्दाफी विरुद्ध जनतां आन्दोलन यानाच्वंगु खःसां थुगुसी उकियात ग्वाकेगु ज्या धाःसा लिउने च्वनाः अमेरिकां हे याःगु खः। देय् दुने वहे देय्या जनतायात आन्दोलन याकाः पिने चाहिं नाटोपाखें हवाई आक्रमण यानाः लिबियायात 'मुक्त' याःगु खः। विश्वय् शक्तिशाली राष्ट्र अमेरिकाया खुल्ला रुपं विरोध यानाः चर्चा कमे याना वयाच्वंम्ह छम्हयां छम्ह हे जक शासक कर्णेल कद्दाफीयात सत्तां चीकेगु लागिं अमेरिकां कुतः यानाच्वंगु आः जक मखु। तर उकी व गबलें नं सफल जुइ मफु। थुगुसी उगु लागाय् वःगु स्वतन्त्रताया लहरया लबः कयाः अमेरिकां गद्दाफीयात स्यानां तुं त्वःतल। संसारय् अमेरिकायात खुल्ला रुपं हाथ्या बिया वयाच्वंपिं सद्दाम हुसेन व ओसामा बिन लादेन लिपा अमेरिकां कर्णेल गद्दाफीयात निशाना याःगु खः। थःत मयःपिंत सखाप यायेगु अमेरिकी अभियानया थ्व छगू मेगु सफलता खः। थुकिं अमेरिकायात गुलि लसता बीगु खः भविष्यय् उलि हे खतरा नं अप्वयेका बीगु स्वाभाविक दु। ४२ दँ लिपा गद्दाफीपाखें मुक्त जूगु लिबियां आः थ्वयां लिपा गज्याःगु लँपु ज्वनी, अनया इतिहास स्वयाः धायेगु खःसा आः हे अनुमान याये फइगु अवस्था मदुनि।

More Stories Like this