एअर मार्शल तयेगु प्रस्ताव वल

प्रधानमन्त्रीपाखें भारतीय नेतात नापलायेगु सुरु
येँ(सन्ध्या टाइम्स)/भारत भ्रमणय् वनाच्वंम्ह प्रधानमन्त्री डा. बाबुराम भट्टराई समक्ष भारतीय पक्षं नेपाःया त्रिभुवन अन्तर्राष्ट्रिय विमानस्थलय् भारतया थःगु हे एअर मार्शल तयेगु प्रस्ताव न्ह्यथंगु खँ सीदुगु दु।
भारतीय विदेशमन्त्री एसएम कृष्णां प्रम भट्टराई समक्ष थ्व प्रस्ताव तयादीगु खः। थौं सुथय् प्रम च्वनादीगु होटलय् वय्कःपिनि दथुइ वार्ता जूगु खः। उगु इलय् भारतीय मन्त्री कृष्णां प्रम भट्टराई समक्ष एअर मार्शल व सीमा सुरक्षाया सवाल ल्ह्वनादीगु खः। तर वय्कःपिनि दथुइ छुं सहमति धाःसा जूगु मदुनि। वार्ता लिपा पत्रकारतलिसे खँ ल्हासें मन्त्री कृष्णां नेपाःया शान्ति प्रक्रियायात ग्वाहालि यायेत थःपिं तयार दुगु खँ कनादीगु खः। लिसें वय्कलं नेपालय् शान्ति कायम जुल धाःसा भारतयात नं अःपुइगु बिचाः अन प्वंकादीगु खः।
प्रधानमन्त्री भट्टराईं थौं हे न्हिनय् भारतीय राष्ट्रपति प्रतिभा पाटिलयात नापनादी। वयां लिपा थौं हे सनिलय् भारतीय प्रधानमन्त्री डा. मनमोहन सिंहलिसे वय्कःया मू वार्ता जुइ। उगु वार्ता लिपा निम्हं प्रमपिं न्ह्यःने च्वनाः छुं सम्झौताय् हस्ताक्षर जुइगु खँ धाःगु दु। छु छु सन्धिइ हस्ताक्षर जुइ धइगु खँ नेपाःपाखें स्पष्ट मयाःसां भारतीय संचार माध्यमतय्सं धाःसा नेपालय् चायेका तःगु भारतीय उद्योगयात नं नेपाली उद्योग सरह सुविधा व क्षतिपूर्ति समेत बीगु छगू सम्झौताय् हस्ताक्षर जुइगु खँ च्वया हःगु दु।
भारतं नेपाः समक्ष अप्वः यानाः सुरक्षा सम्बन्धी सवालत ल्ह्वंसां नेपालं धाःसा आर्थिक एजेण्डात ल्ह्वनीगु खँ धाःगु दु। नेपाःपाखें भारतयात दोहोर कर हटे यायेगु, भारतं नेपालय् वइगु विद्युत प्रशारणया लाइन थपे याना बीगु लागिं प्रस्ताव तइगु खँ धाःगु दु। भारतय् नेपालं छु छु सन्धिइ हस्ताक्षर याइ धइगु खँ धाःसा नेपाः पक्षं आः तक खुले यानाः धाःगु मदुनि।
शान्ति प्रक्रियाया ज्या ठप्प
प्रधानमन्त्री डा. बाबुराम भट्टराई भारत वनेवं नेपालय् न्ह्यानाच्वंगु शान्ति प्रक्रिया संविधान निर्माण सम्बन्धी ज्या ठप्प जूगु दु। प्रम भारत वनेवं आः मेगु ज्या जुइ मखुत धकाः माओवादी अध्यक्ष प्रचण्ड म्हिगः परिवारलिसें नगरकोटय् वंगु दुसा नेपाली कांग्रेसया सभापति सुशील कोइराला नं थौं गोर्खापाखे झाःगु दु।