न्हूदँया लसताय् मंकाः संघर्ष समितिया तुच्चा
नेवाः स्वायत्त राज्य मंकाः संघर्ष समितिं नेपाल संवत् ११३२ न्हूदँया लसताय् बिहीवाः भिंतुना कालबिल नापं तुच्चा ज्याझ्व यात ।
'नेपाल संवत् ११३२ न्हूदँया भिंतुना, नेवाः स्वायत्तता सहित गणतान्त्रिक संघीय नेपाःया मनंतुना' धइगु नारा बियाः संघर्ष समितिं येँया भृकुटी मण्डपय् उगु तुच्चा ज्याझ्वः याःगु खः । ज्याझ्वलय् थीथी राजनीतिक दलया नेतात, नेपालभाषा ख्यःया कार्यकर्तात, व्यापारी, प्रहरी अधिकृत लगायत आपालं मनूतय् ब्वति दुगु खः ।
ज्याझ्वःलय् न्ववानादिसें संस्कृतिविद् सत्यमोहन जोशीं नेवाः राज्य प्राप्त यायेगु बांलागु अवसर दुगु इलय् नं झी नेवाःत छप्पँ छधी जुयाः न्ह्याःवने मफुसाः झीगु सन्ततिं तसकं दुःखसि मालीगु धयादिल ।
नेपाली कांग्रेसया उपसभापति रामचन्द्र पौडेलं थःथःगु जातीय पहिचान मालेत थीथी पुचः जागरुक जुयाः वयाच्वंगु खँ सकारात्मक जूगु धयादिसें तर पहिचान मालेगु झ्वलय् उकिं संकिर्णताया भावना ब्वलंके मजिउगु धयादिल ।
अथेहे माओवादी प्रवक्ता दिनानाथ शर्मां नेपाल संवत् नेपाःया मौलिक संवत् जूगुलिं थुकियात झी फुक्कसिनं थःगु धासें नालाकायेमाःगु धयादिल । वय्कलं पहिचान व समर्थ्यता सहित राज्य पुनर्संरचना यायेगु हे पाय्छि जूगु धयादिसें नेवाः राज्य प्रति माओवादी प्रतिबद्ध दुगु धयादिल ।
नेकपा (एमाले)या नेता सिद्धिलाल सिंहं सेना समायोजन व शान्ति प्रक्रिया क्वमचायेकं संविधान निर्माण जुइमफइगु धयादिसें अथे जुसाः जक संघीयता व उकि दने नेवाः राज्य नं सुनिश्चित यायेफइगु न्ह्यथनादिल ।
ज्याझ्वलय् संघर्ष समितिया वर्तमान नायः नरेश ताम्राकारं न्हूगु संविधान न्हूदँ ११३२ दुने च्वयेमाःगु धयादिसें उगु न्हू संविधानया नां 'नेपाःया संविधान ११३२' तयेत माग यानादिल ।
