विपक्षीतय्गु माग पूवंकल

वंगु न्यान्हु न्ह्यः निसें रक्षा मन्त्री शरद सिंह भण्डारी व भूमिसुधार मन्त्री प्रभु शाह पिनिगु राजिनामाया माग यानाः व्यवस्थापिका संसद अवरुद्ध यानावयाच्वंगु खः । थुकियात कयाः वंगु वुधवाः निम्ह मन्त्रीतय्त नं पदमुक्त याना बीवं अवरुद्ध जुयाच्वंगु संसद न्ह्याःगु दु । तर भूमिसुधार मन्त्री शाह व रक्षामन्त्री भण्डारीं निम्हय्स्यां नं थःथःगुहे कथं प्रतिकृया व लिच्वः न्ह्यःने हःगु दु । भूमिसुधार मन्त्री शाह नं प्रधानमन्त्री डा. भट्टराइनाप लानाः सहलह व्याकेवं आम सञ्चार माध्यमय् राजिनामाहे वल धयाथें बुखँ पिहां वःगु खः । यथार्थय् राजिनामा मव्यूगु हे जुयाच्वन । राजिनामा मव्युसे च्वनाच्वंम्ह शाहनं व्यवहार व प्रतिकृया नं उकिया पाय्छि अःखः कथं प्वंकेगु ज्या जुयाच्वनेवं राजिनामा हे व्यूगुकथं काःगु खः । उखे रक्षामन्त्री भण्डारीयात राजिनामा बीकेत फोरम लोकतान्त्रिकया केन्दि्रय समितिया मुंज्या च्वनाः वयकःयात लित सःतेगु नितिं ताःहाकःगु छलफल जूगु नं खः । न्हापांगु खुन्हु खँ क्वमज्यनेवं कन्हे खुन्हु च्वनाः सहलह व्याकेत स्वःगु खः । तर केन्दि्रय समितिया वैठकं रक्षामन्त्री भण्डारीया पक्षय् खँ न्ह्यःने वयेवं उगु पार्टीया नायः गच्छेदारं छुंहे खँ क्वछीमखुगु खः । वहुमतया खँ रक्षामन्त्रीयात लित मसःतेगु निर्णय जुइगु अवस्था वयेवं निर्णय हे यायेमफयेवं मुंज्या विना निर्णय क्वचाःगु खः ।

वंगु न्यान्हु न्ह्यः निसें वयकःपिं निम्ह मन्त्रीतय्गु विरुद्ध विपक्षी नेपाली कांग्रेस व एमालेपिसं संसद अवरुद्ध यानावःगु खः । थुकियातहे सम्वोधन यायेगु झ्वलय् उपप्रधान लिसे गृह मन्त्री व फोरम लोकतान्त्रिकया नायः विजय गच्छदारनाप सहलह व्याकाः भूमिसुधार मन्त्री शाहया नापनापं रक्षामन्त्री भण्डारीयात नं पद विमुख याःगु खः । छम्हय्सित हत्याया द्वपं व मेम्हसित देशघातीया द्वपं फयेमाःपिं मध्ये शाहनं थःगु जिल्लाय् थः समर्थकतय्त जिन्दावादया नारा लगय् याकाः सुम्क च्वनसा मेम्ह भण्डारीं छगू प्रेस सम्मेलन यानाः थःयात राष्ट्रघातीया द्वपं वियाः संसद अवरुद्ध यानाः राजिनामाया माग यानावया च्वंपिं नेपाली कांग्रेस व एमालेयात तप्यंक राष्ट्रघाती जक मखु राष्ट्रद्रोहीया मुद्धा तयेत नापं हाथ्या विया द्यूगु दु ।

थुकियात भण्डारीया सः न्ह्याक्कोहे तस्सः जूथें आमजनता विशेष यानाः मधेसया जनतां छु गुकथं काइगु खः यायेफूगु मदु । गल्ति यायेगु अले उकियात पश्चाय् चायेगु पल्सा अःखतं द्वपं व्यूपिं प्रति आक्रोश प्वंकेगु धयागु लोकतान्त्रिक परिपाटी मखु, वंगु वुधवाः संसदया वैठकय्हे प्रधानमन्त्री डा. बाबुराम भट्टराइृं निम्ह मन्त्रीयात पदमुक्त यायेगु घोषणा यानाः प्रतिपक्षी नेपाली कांग्रेस व एमालेया म्हुतुप्वाः तिकाः अवरुद्ध संसद चायेकेत ताःलागु दु । प्रधानमन्त्री डा. भट्टराईं भण्डारीया खुद जिम्मेवारी गच्छेदारयात लःल्हाना व्यूगु खः । फोरम लोकतान्त्रिकया वहुसंख्यक केन्दि्रय समितिया दुजःपिसं रक्षामन्त्री भण्डारीयात लित मसःतेगु खँ तःगु खः । तर थःपिनिगु प्यंगू बुंदे सहमति त्वामथःसे प्रतिपक्षीतय्गु मागयात सम्वोधन यायेगु ज्या अःपुक्क जूथें आः फोरम लोकतान्त्रिक दुने थ्व विषययात कयाः आः थत्थेहे मखुसां लिपा भाँड भैलो मच्चय् जुइगु निश्चित खनेदु ।

More Stories Like this