'एकताया नामय् आत्मसमर्पण यायेगु जुइमखु’

येँ (झीगु स्वनिगः)

एकीकृत नेकपा -माओवादी)या मूछ्याञ्जे रामबहादुर थापा बादलं पार्टी एकताया नामय् भारतया न्ह्यःने आत्मसमर्पण यायेगु जुइमखु धकाः धयादीगु दु । पुलांगु राजनीतिक दल माओवादीया छगू पुचः भारतया ईशाराय् ज्या यानाच्वंगु दु धयादिसें नेता वादलं राष्ट्रियतायात समाप्त यानाः एकीकृत जुइगुया छुं नं कथंया औचित्य मदु धकाः स्पष्ट यानादिल । म्हिगः विहिवाः क्रान्तिकारी पत्रकार संघ बाग्लुङपाखें याःगु पत्रकार सम्मेलनय् माओवादीया मूछ्याञ्जे वादलं अथे धयादीगु खः ।

भारतं आःया अवस्थाय् नेपालय्् तप्यंक हे हस्तक्षेप यानाच्वंगु दु धासें नेता वादलं धयादिल 'आत्मसमर्पण राष्टहित व जनादेशया अःखः खः, झीत दासत्वमान्य जुइमखु ।' प्रधानमन्त्री डा. बाबुराम भट्टराईया भारत भ्रमणया झ्वलय् विवादास्पद छुं नं कथंया सन्धि सम्झौता यायेगु जुइमखु धकाः निर्णय जूगु दु धयादिसें वय्कलं प्रधानमन्त्रीया भारत भ्रमणया झ्वलय् असमान सन्धिया विषयसं सहलह जक जुइ धयादिल । नेता वादलं धयादिल 'भ्रमण शान्ति व संविधानया विषयसं केन्दि्रत जुइ ।' वय्कलं माओवादीया लडाकुयात समायोजन लिपा निःशस्त्र भूमिका बिइगु षडयन्त्र यायेत स्वयाच्वंगु दु धकाः नं स्पष्ट यानादिल ।
शान्ति स्थापना व संविधान च्वयेगु सन्दर्भय् न्हापाया सहमति व सम्झौताया पूर्ण पालन यायेमाःगु खँय् बहः बियादिसें एकीकृत माओवादीया मूछ्याञ्जे बादलं धयादिल 'कांग्रेस व एमालें न्हापाया सम्झौता पालना मयासे बिस्युं वनेत स्वयाच्वंगु दु ।'

न्हूगु सुरक्षा नीति लागू यानाः लडाकुतय्त सम्मानजनक समायोजन यायेमाः धकाः नं वय्कलं बहः बियादिल । पत्रकार सम्मेलनय् पत्रकारतय्सं एकीकृत माओवादी पार्टी तज्याइगु खः ला कि छु खः धकाः न्यंगु न्ह्यसःया लिसः बिइगु झ्वलय् वय्कलं धयादिल 'सहलह, अन्तक्रिर्या व बहसं पार्टीयात न्हूगु कथं एकता जुइ । माओवादी पार्टीइ खने दुगु विवाद छुं दिं लिपा हे च्वनेत्यंगु केन्द्रीय कमिटीया मुँज्याय् सहलह जुइ । '