नेवाः राज्यप्रति माओवादी व एमालेया ऐक्यबद्धता

येँ (झीगु स्वनिगः)

नेवाः स्वायत्त राज्यया ज्याझ्वलय् एकीकृत नेकपा (माओवादी) व नेकपा (एमाले) एक्यबद्धता दु धकाः निगू हे पार्टीया नेतातय्सं दावी यानादीगु दु । नेवाः स्वायत्त राज्य मंकाः संघर्ष समितिया ग्वसालय् नेपाल संवत् ११३२ न्हूदँया लसताय् म्हिगः विहिवाः याःगु तुच्चा ज्याझ्वलय् न्वंवासें माओवादीया प्रवक्ता दिनानाथ शर्मा व एमालेया सल्लाहकार समितिया नायः सिद्धिलाल सिंहं अथे दावी यानादीगु खः ।

माओवादीया प्रवक्ता शर्मां नेवाः राज्य प्राप्तिया नितिं नेवाःतय्सं यानाच्वंगु आन्दोलन नापं नेवाः राज्यप्रति हे एक्यबद्धता दु धयादिसें आःया अवस्थाय् पहिचानयात हे दक्ले अप्वः प्राथमिकता बियाः राज्यया पुनर्संरचना यायेमाः धैगु थःपिनिगु पार्टीया स्पष्ट धारणा दु धकाः धयादिल । वय्कलं आःया अवस्थाय् पहिचान व सामथ्र्यताया आधारय् राज्य पुनर्संरचना यायेमाः धकाः संविधानसभाया राज्य पुनर्संरचना समितिं तयार याःगु नापं उकियात कयाः छगू कथं विवाद जुयाच्वंगु दु धकाः न्ह्यथसें पहिचानयात हे न्हापांगु प्राथमिकता बिइमाः धकाः धयादिल । अथे हे एमालेया नेता सिद्धिलाल सिंहं नं नेवाः राज्यया सवालय् नेवाःत छप्पँ जुयाः न्ह्याः वनेमाः धयादिल ।

ज्याझ्वलय् नेवाः संस्कृतिविद् सत्य मोहन जोशीं नेवाः भाषा, संस्कृति, जातिया पहिचान ल्यंकाः तयेत नेवाः स्वायत्त राज्य माःगुलिं फुक्क नेवाःत छप्पँ जुयाः न्ह्याः वनेमाः धकाः बः बियादिल । नेवाः स्वायत्त राज्य मंकाः संघर्ष समितिया नायः नरेश ताम्रकारं सभानायःया थासं न्वंवासें आःया अवस्थाय् परिवर्तनया संवाहक माओवादी, कांग्रेस व एमाले जूगुलिं थ्व हे स्वंगू दलं नेपाल संवत् ११३२ या दुने शान्ति प्रक्रिया पूवंकेगु नापं नेवाः स्वायत्त राज्य सहितया संघीय लोकतान्त्रिक गणतन्त्र नेपाःया संविधान तयार यायेमाः धकाः धयादिल ।