सक्व वज्रयोगिनी मूर्ति संरक्षणया छुं खँ

प्रकाशमान सक्व
पौराणिक व धार्मिक महत्वं अति तःजिक हनातःम्ह नेपाःया शिरोमणि उग्रतारा बज्रयोगिनी देवीया मूर्ति संरक्षण यायेत सक्वय् थौंकन्हय् बज्राचार्य संघं छगू भेला सःताः द्यःपिनिगु मूर्ति झिंनिदँया छक्वः न्यासः लुइगु, रंगं छायेगु व द्यः हे स्यंल्ह्वं यायेगु ज्या क्वचाये धुंकाः आः जात्रा यायेमाःपिं म्हासुख्वाः माजु व चीभाःद्यः व मेमेपिं लोकेश्वर, बसुन्धरा व मञ्जुश्री द्यःपिंत मथीकुसे पुजारी हे तयाः पुजा याकाच्वंगु ज्याय् न्हापांनिसें द्यः कियाः, भागि यानाः, पुजा याना वयाच्वंपिं निम्ह मेपिं मनूतय्सं पिकाःगुलिं छु याःसा जी धकाः सक्व देय् व जःखः लागाया हनेबहःपिं भद्रभलाद्मीतय्गु सहलह कथं पुजारी छम्ह तयाः नियमपूर्वक मू देगलय् थें तुं हे पुजा यानाः स्वां, सिन्हः, जल बीगु ज्या बज्राचार्य पाःलाःपिंसं यानाबिज्यात धाःसा जात्रा जःछि बाहेकं द्यःपिं मथिकूसां जिउ धइगु निर्णय याःगु दु।
सक्व बज्राचार्य संघं वंगु वैशाखंनिसें निलात्या बीकाः मू देगःया उग्रतारा बज्रयोगिनी, सिंघिनी व्यांघिनी नापं मेमेपिं चायापिं द्यःपिं न्ह्याम्ह न्हूम्ह दयेकाः मू रंग छायाः न्यास लुइगु ज्या याःगु खः। अथे हे आः हाकनं लुँ, वहः, सिजः आदियापिं द्यःपिनिगु अवस्थायात देखा दुपिं बज्राचार्य द्यःपाःलाःपिंसं जाँच याना स्वःबलय् जात्रा यायेमाःपिं म्हासुख्वाः माजु व चीभाःद्यः नं यक्व जीर्ण जुइ धुंकूगुलिं न्हूम्ह द्यः दयेके हथाय् जुइधुंकूगु खँ भेलाय् प्रस्तुत याःबलय् आः वइगु सक्व जात्रा तकया दुने क्वचाइकथं द्यःपिं फुक्कं धातुयापिं न्हूम्ह हे दयेकाः द्यः जात्रा यायेगु खँ क्वःछित। थुकिया लिसे म्हासुख्वाः माजु व चीभाःद्यःयात मस्यंकुसे गथे खः अथे हे छगू मेगु हे क्वथाय् तयाः म्यूजियम स्वरुपय् सुयां स्वयेगु, अध्ययन यायेछिंके बीगु नं निर्णय याःगु खः। छाय्धाःसा पुलांगु स्यंकाः न्हंकाः छ्वल धाःसा भावी पुस्तां न्हापाया पुलांम्ह द्यःया अवस्थाया बारे छुं मसिल कि इतिहास व आस्थायात ल्वःमंकाः छ्वयेफु। आःयाम्ह म्हासुख्वाः माजु जुजु त्रिभुवन व प्रधानमन्त्री चन्द्र शम्शेरया पालय् वि.सं. १९७१ य् दयेकूम्ह खःसा वि.सं. २०५३ सालं जात्रा याःबलय् सक्व प्रहरी व सर्वसाधारण ल्वापुइ अप्पां कयेकूगु व हवाइफायर याःगु झ्वलय् द्यःयागु ख्वालं हे आपां कःवनाः द्यःयात नांजाःम्ह पण्डित बद्रिरत्न बज्राचार्यया संयोजकत्वय् बृहत पस्ताः पुजा यानाः स्यं ल्ह्वं याःगु बखतय् लुँ जक मुक्कं स्वीखुतोला लगे जुलसा द्यः ज्याया लागिं म्होतिं सःम्ह ५० गुर्जुपिं मध्ये पुजारी, थाकुलि, गुरुमांपिं, गीताचार्य, पँय्ताः खलः पञ्चताल बाजं थाइपिंनिसें नकेगु ज्वरे याइपिं, माःगु तक सामान मिले याइपिं लिमलाक स्वला तक द्यःज्याय् समर्पण यानाः ज्या क्वचायेकूगु खः।
आः ई हिलेधुंकल, म्हासुख्वाः माजुया ज्या थथे सदां यानाच्वने थाकुगु खः धइगु इतिहासं क्यनाच्वंगु दु। निसः स्वसः दँय् वा निक्वः द्यः दयेकेज्या जुइ थास २०५३ सालंनिसें २०६८ साल तकया दुने द्यः दयेके हथाय् हे जुइधुंकल। उकिं सक्व बज्राचार्य संघं अपिल यानाः न्हूम्ह द्यः दयेकाः दँदँ तक सुरक्षित जुइकेगु लागिं पूजा याइपिं ग्वाहालि फ्वंगु खः। द्यःया ख्वालय् सिन्हः तिकेगु व लडु प्यारा म्हुतुइ ल्वसुकेगु, केमिकल सिन्हः, चिनी ल्वाकज्याःगु मरि, केरा फलफूल व लः नापं द्यःया ख्वालय् लुइगुलिं लुं पानातःगु ख्वाः ज्यलाः सिजः पाता खने हे दयाः नेपाःया शिरोमणी धइगु ताज कयाच्वंम्ह द्यःया ख्वाःया रंग पाना वनाच्वंगु दुःखया खँ खः। नापं द्यः थियाः हे भागि याये मखन धकाः तंचायाः ल्वापु थयेगु खँ ल्हाना जुइपिंसं छक्वः आः नुगलंनिसें बिचाः याना स्वये मालाः द्यःया संरक्षण यायेगु ज्याय् जात्रां च्यान्हु झिन्हु बाहेक सक्वय् गुबाहालय् तइतःबलय् दर्शन यायेगु व पूजन, पुजारी यानाः झीत बीगु नापं जल, प्रसाद, सिन्हः, स्वां, दयेवं गाः ला कि मगाः? गथे मू देगलय् द्यः थी मदयेका तःगु झी सकसिनं सिउगु हे खँ खः। हाकनं द्यःपिंत थियाः हे जक भागि यानां अप्वः धर्म लाइगु व मथीकेवं म्हो धर्म लाइ धइगु मानसिकता चीकाः थौंकन्हय् लुँया भाः व बेसाःभाः थिकेगु नापं बज्राचार्य गुर्जुपिं नं थःथःगु लजगाःया इलं मलाःगु विचाः यानाः वसपोलपिंसं यायेत्यंगु भिंगु व निंगु द्यःया ज्याय् झी सकसिनं ग्वाहालि यायेगु स्वयेमाः।
छाय्धाःसा थौंकन्हय् स्वनिगलय् मनूतय्गु अप्वः संख्या अप्वये धुंकल। न्हापाथें सीमित दर्शनार्थी जक मखुसें इमिगु पूजा याइगु क्रियाकलापयात ध्यानय् तयाः चाकः मत च्याकेगु, देवा देगलं पिने तयाः च्याके बीधुंकल। गुँबहालय् सतलय् सीधुंकूपिनिगु किपा तानाः विरुप जूगु कलात्मक झ्याः व थां बचे यायेत फोटो, तस्वीर आदि चीके धुंकल धाःसा देगलय् चाकःछि झल्लर कापः खायाः द्यः पुज्याये धुनेवं छुं ई लिपा लिकया बीगु यायेधुंकल। छाय्धाःसा झल्लर कापतय् करेन्ट सर्ट जुयाः मि च्यानाः देगःयात हे लिच्वः लाः वंगु निक्वः प्यकःया घटनायात कयाः तत्कालीन बज्रयोगिनी सेवा समितिं झल्लर कापः लिकायेगु, तस्वीर लिकायेगु, द्यःयात छानातःगु वसजाः आदि माः थाय् तयाः संरक्षण याःगु खःसा आः न्हूपिं द्यःपिंत मथीक पुजारीं हे पुज्यानाः बांलाःगु ज्याया शुरुवात खः धइगु वाःचायेके माल।
झीसं सिउ असनय् अन्नपूर्ण, तिंख्यलय् मांकाःद्यः, स्वयम्भूइ हारती मां, विजेश्वरीइ मां, दक्षिणकाली मांपिंत आः प्रत्यक्ष पुजा मयाकुसे मथीकुसें पुजारीं हे पुज्याना बीगु ज्या शुरु यायेधुंकल। सुयां छुं छायेमाःसा पुजाबलय् पात्रय् तया बीवं गाइगु यायेधुंकल। बुद्धनीलकण्ठय् द्यःया तुति निपा जक पुज्याकाः द्यः मथीक दर्शन याकेधुंकल धाःसा समसामयिक बांलाःगु ज्याय् सक्वया बज्राचार्य संघं याःगु ज्याय् स्वकुमितय्सं व जःखःया गांयापिंसं हःपाः बियाः बी मालेधुंकल। अथे मखु धकाः न्हापांनिसें यानागु याना वयाच्वनागु परम्परा धकाः च्वन धाःसा झी द्यायेमाली। छाय्धाःसा भिंगु ज्याय् लँ पन कि बज्राचार्य पुजारीतय्सं यायेमाःगु ज्या दिकाः द्यः मदयेके बिल धाःसा पुलांम्ह हे जक द्य पुज्यानाः झन झन जीर्ण यानाः नापं जात्रा यायेगु इलय् सुनां सुयातं पने मफइबलय् द्यःया ल्हाः छ्यों हे कुतुं वल धाःसा सुयात पाः यायेगु? द्यः गन गन दिकेगु धइगु नियम पालन जुयाच्वंगु दु ला? झ्यातुल कि ध्वाक्क दिकेगु याःगुलिं द्यःया अंग त्वःधलाः द्यः दयेके माःगु ला जु हे जुल। उकिं सकसिनं विचाः यायेमाःगु ई जुल।
पुलांगु थ्यासफुली द्यः जात्रा यायेमाःगु खँ स्वयेगु खःसा ने.सं. ७७१ य् च्वयातःगु खँग्वः थथे दु:�
.... चुर्तुदशीकुन्हु खः विलाशरथ दयेके कुहां बिज्याकेकुन्हु द्यः दिर्पुलीस दितके।। थनली स्वांलास दितकाओ दृष्टि कनकाओ शंषदेव राजा जुथालतक लँ स्वल वनाव पालिया न्हवने दिनाव पालिस बिज्याका श्री ३ या जवस चैत्यभराड तया जवस सिंघिनी तया खवस ब्यांघिनी तयाः।। थ्व श्री उग्रतारा बज्रयोगिनी परमेश्वरीया जात्राया अधिकार दकों जोगदेवया जुल।। भो जोगदेव ! छनत वा वा छन संतानयात ग्वम्ह मुष्यनं मान्ययात जित मान्य याकथें जुल।। थ्वयात जि नं शुदृष्टीं सवयाव नाश याये जुल।। ग्वम्हसेन अपमान यात वम्हसयात जि नं कुदृष्टि स्वयाव नाश याये जुल।। सत्य सत्य सत्य नं याय जुल धकाः त्रिवाचा यानाव श्री उग्रतारा बज्रयोगिनी परमेश्वरीं नं जोगदेवयात आज्ञा दयेकाव बिज्यात।। .... हे इश्वरी कालिकालस अपा जुयावनी व्यलस पापया सम्हय जुयु।। जि सन्तान अलसि जुयाव मुर्ख जुयु।। छलपोलयात गथे नित्यार्जन याये धकं गोचर याना।। गन इश्वरी नं आज्ञा जुल।। भो जोगदेव जित नित्यार्चन पंचोपचारनं गाक।। .... जोग देवं गोचर याना।। हे जगमाता छलपोल नापं लिपा सम्वाद दयीओ मखु जि सन्तान मुर्ख जुयावनि छलपोलया अपराध याना वनी व्यलस क्षमा याना बिज्याय माल।। धक इनाप याना व्यलस देवी नं आज्ञा जुल।। त्रिवार तक क्षमा यायेनु ल उप्रान्त क्षमा मजुल धकं आज्ञा जुयाव बिज्यात।। जिगु सन्तान दल पर्यन्तं थुगु स्वया शास्त्र धर्म्मस च्वनेमाल।। थनलिं इश्वरी नापं संवाद मदत जुल।। .... अभिलेख नं
१) स्वस्ति श्री एकजटाय नमः।। नेपालिके हय गणेश शरदर्षियुतेक सम्वत्सरेण नियुते खलु फाल्गुनेस्मिन्।। .... सम्वत् ७१७ फागुन वदी ८ श्री ३ बज्रयोगिनी परमेश्वरी जीर्ण जुयाव जात्रा यायत संकस्त जुव स्वयाव श्री श्री शिवसिंह देव राजाया पारस ध्वंकल टोलया दोक्षे च्वनम्ह अमृतराजभारो पण्डूमणी नानी सहभार्या जयराजं अर्थ धर्म मोक्ष काम याङा द्यः जीर्णोधार याङा व लुनं सियाबिल। थ्व बेलस श्री बज्राचार्य ज्ञानवन्दे श्री देवकी बन्दे जूपिंसं प्रतिषकर्म पुजा याङा जुलो।। � बेशत पण्डुमनी निवा जिनसिंह वन्दे, रत्नदेव, इन्द्रसिंह जुलो। वर्ष वर्ष पतिं बुसाध न यायेयात पूजा होम यायेत व वसत देवता पनिस्ता छाय् यात वेन्दोल बुरोपनी २ सिगलिकति बुरु रोपनी ५ पाद्यात बुँ रोपनी १५ दाम ८ समेत दोहलपा जुलो।।
२)।। नमो एकजटायै।। .... अव्दोशर युगादी फाल्गुण सित द्वादसे।। यतेच दिन संयुत्तेक आहोरात्र कृतौकृतः।। शास्त्रोन्क्त च विधानकारि तंच भूपतिः।। दानपति काष्ठमण्डप महानगराधिपति लक्ष्मी नरसिंह मल्ल देवमाहाराजा नं श्री ३ एकजरी माजु जीर्ण जुयाव न्हपा सिजलया ख्वाल लाहा लुँयागु।। थन राजानं म्ह नापं न्हूलं यानाव लुं नं सियाव जिर्णोधार याक जुल।।
।। सम्वत् ७४५ फागुन शुक्रया द्वादशी परत्रयोदशी शौभाग्य योग बुद्धवार खुन्हु अहोरात्र यज्ञ याना व प्रतिष्ठा याना।। थ्व बेलया मूलाचार्य श्री ज्ञानकृत देव जुल।।
३) श्री एकजटी माजुया तुती नेपां तोक धुलाव नाना उत्पात देश २ पतिं भोलोयनं कल .... कोबुई नं अपालं वल .... मचातेके भुसाकै वयाव अपालं सिक जुल।। देश यल देश खोप देश सकभिनं दावली वियान नाना प्रकारनं शान्ति यानानं शान्ति मजुयाव .... श्री एकजटी माजुया जीर्णोद्वार याये धुनाव तिनी रोग आदिं शान्ति जुयाव वन शुभम्।।
४) श्री मद्वज्र योगिन्यै नमः।। संवत् ७५० न्हापा श्री २ जयलक्ष्मीनरसिं मल्ल देवराजां दयेकातओगु जात्राया लुंसिया खत जीर्ण जुयाओ सम्वत् ९४९ चैत्र सुदिन द्वादशि उप्रोत त्रयोदशी बृहस्पतीवास दुसाल कृया साईत दिन प्रतिष्ठा कर्म याङा .... लुं नं सियाओ विमान खटपोल अजु समेतं लुन सियाओ दोहोलपा जुलो .... न्हापायागु सिजपति धानि २७ लुलुतिनागु तोला ७ नं थुकि सं छ्याया जुलो।।
५) सम्वत् .... श्री भूपालेन्द्र माहाराजां दयेका ओगु जात्रायायमागु स्वयम्भु चैत्य योग्यश्वर स्यङाओ थन राजानं दयेकाओ लुं नं सियाओम्ह योग्यश्वर जीर्ण जुव खङाओ पुजकारी श्री गजेन्द्र बज्रनं दाता गोवर्धनसिं किर्तिनर्सि नेम्हवाकाज्ञ याके बिन्ति याङा न्हुगु दयेका व जात्रा याङा जुलो।। सम्वत् ९५७ फागुन कृष्ण पञ्चमी।। थ्वबेलस बज्राचार्यै थाकाली गजेन्द्र बज्र न्वकु हर्ष भद्र, रत्नानंद, चितामुनि व विद्यानन्द।। शुभम्।।

More Stories Like this