असोजया मध्य तकया दुने स्वीखुगू अर्ब राजस्व दुहां वल

येँ(सन्ध्या टाइम्स)/सरकारं चालु आर्थिक दँया वंगु असोज मध्य तकया दुने स्वीखुगू अर्ब न्यय्गू करोड न्यय्प्यंगू लख तका राजस्व संकलन याःगु दु। अर्थमन्त्रालयं पित बिउगु विज्ञप्तीइ चालु आर्थिक दँय् संकलन जूगु राजस्व थगुने थ्व हे अवधिइ स्वयां १० दशमलप २२ प्रतिशत अप्वः खः।
मन्त्रालयं पित बिउगु विज्ञप्ती कथं चालु आर्थिक दँय् असोज २० गते तकया दुने वैदेशिक सहायता अन्तर्गत अनुदान सहायताय् प्यंगू अर्ब स्वीन्हय्गू करोड, त्यासा ग्वाहालिपाखें ख्वीप्यंगू करोड यानाः न्यागू अर्ब छगू करोड तका वःगु न्ह्यथनातःगु दु।
नेपाःया आर्थिक विकासय् लगानी यायेत दातृ संस्थातय्सं इच्छा यानाच्वंगु नं मन्त्रालयं न्ह्यथंगु दु।
सरकारं वंगु छुं दिं न्ह्यव जक नकलि भ्याट बिल दयेकाः राजस्व छले याःपिं न्यासः स्वयां अप्वः मध्ये स्वसःया अनुसन्धान यानाः इमिगुवाखें स्वंगू अर्ब नीगुंगू करोड तका कर क्वःछिनाः म्हयेगु ज्या जूगु नं मन्त्रलायं विज्ञप्तीपाखें जानकारी बिउगु दु।
थ्व हे झ्वलय् अपचलनयात निरुत्साहित यायेत नालेमाःगु कार्ययोजना लिसें नीतिगत कानुनी व्यवस्थाया सम्बन्धय् राय सल्लाह बीत नेपाल राष्ट्र बैंकया डेपुटी गभर्नरया संयोजकत्वय् छगू उच्चस्तरीय सुझाव समिति नं गठन याःगु दु।