वैद्य पक्षं पार्टीइ न्ह्यब्वइगु गोप्य प्रस्ताव

येँ(सन्ध्या टाइम्स)/एकीकृत माओवादीया अध्यक्ष प्रचण्ड व उपाध्यक्ष डा. बाबुराम भट्टराई नं सरकार गठनया नितिं मधेसी मोर्चालिसे याःगु सहमतियात कयाः बरिष्ठ उपाध्यक्ष मोहन बैद्य
किरण पक्षधरं असहमतिया बुँदात दुथ्याकाः केन्द्रीय कमिटीया बैठकय् पेस यायेगु निंतिं गोप्य प्रस्ताव दयेकातःगु दु।
उगु प्रस्तावय् माओवादी पार्टीं जनताया संघीय गणतान्त्रिक संविधान दयेकेगु धकाः पारित यानातःगु थासय् मोर्चालिसे याःगु सहमतिइ लोकतान्त्रिक गणतन्त्र धकाः च्वयातःगुली आपत्ति प्वंकातःगु दु। उगु सहमति पार्टीया निर्णय विरुद्ध खः धकाः तकं न्ह्यथनातःगु दु।
अथे हे जनमुक्ति सेनायात समूहगत समायोजन यायेगु विषययात अबमूल्यन यानातःगु खँ न्ह्यथँसें आपत्ति प्वंकातःगु दु।
आःया नितिं केन्द्रीय सदस्यतय्त जक इना बिउगु उगु गोप्य प्रस्ताव औपचारिक रुपं सार्वजनिक मयानि। प्रस्तावय् पार्टीया अध्यक्षयात संवोधन यानातःगु उगु प्रस्तावय् मधेसी मोर्चालिसे याःगु सहमतिप्रति आपत्ति प्वंकेगु नाप नापं विरोध तकं यानातःगु दु।
उगु प्रस्तावयात कयाः कार्तिकया निगूगु वालय् जुइगु केन्द्रीय कमिटीया बैठकय् बैद्य पक्षधरत कडा रुपं प्रस्तुत जुयादी धकाः माओवादीया छम्ह नेतां धयादीगु दु।