'प्रम लिहां वयेवं सहमति'
येँ (सन्ध्या टाइम्स)/शान्ति प्रक्रियाया खँय् मूमू स्वंगू दल एकीकृत माओवादी, नेपाली कांग्रेस व एमालेया दथुइ सहमति जुइधुंकूगु दुसा व प्रधानमन्त्री डा. बाबुराम भट्टराई भारत भ्रमण यानाः लिहां वयेवं उकियात घोषणा याइगु जूगु दु। स्वंगू दलया शीर्ष नेतातय्गु दथुइ थौं सुथय् बालुवाटारय् च्वंगु बैठक लिपा शान्ति व संविधानया विषययात कयाः सहमति लिक्क थ्यंगु खः ।
म्हिगः बहनी गठन याःगु स्वंगू दलया नेतात दुथ्याःगु स्वम्हेसिया कार्यदलय् जूगु छलफलया बारे शीर्ष नेतात एकीकृत माओवादीया अध्यक्ष प्रचण्ड, कांग्रेसया सभापति सुशील कोइराला एमालेया अध्यक्ष झलनाथ खनाल लगायतया नेतातय्त थौं सुथय् ब्रिफिङ याःगु खः ।
अथे बैठक लिपा कार्यदलया दुजःपिं माओवादीया वर्षमान पुन, कांग्रेसया कृष्ण सिटौला व एमालेया भीम रावलं मंकाः कथं संचारकर्मीतलिसे खँल्हासें धयादिल, 'स्वंगू दल सहमति लिक्क थ्यंगु दु। प्रधानमन्त्री भारत भ्रमण यानाः लिहां वयेवं सार्वजनिक यायेगु जुइ ।'
स्वंगू दलया बैठक लिपा बालुवाटारय् हे च्वंगु सेना समायोजन विशेष समितिया बैठकं माओवादी लडाकुया ७ गू हे शिविरय् तत्काल प्राविधिक समिति छ्वयेगु निर्णय याःगु दु। अनमिनं प्रमाणीकरण याःपिं १९ हजार ६०२ म्ह लडाकुया विवरण अद्यावधिक यायेत पुचः छ्वयेगु धकाः निर्णय जूगु खँ दुजः जितेन्द्र देवं धयादीगु दु। थ्व सिबें न्ह्यः समितिं २१० म्हेसिया सर्वेक्षण पुचः गठन यायेगु निर्णय याःगु खः ।
वहे निर्णय कथं विज्ञापन व अन्तर्वार्ता जुइधुंकूसां इमिगु नियुक्ति धाःसा मजूनिगु खः। नियुक्ति प्रक्रिया सुरु यानाः तत्काल शिविरय् टोली छ्वयेगु धकाः समितिं निर्णय याःगु दु। टोलीं लडाकुया ल्याः खायेगु नापं मेमेगु खँय् अद्यावधिक याइ धाःगु दु ।
मतभेद सार्वजनिक मयायेगु सहमति
स्वंगू दलया शीर्ष नेतातय्गु थौं च्वंगु बैठकय् मतभेदयात सार्वजनिक मयायेगु सहमति जूगु दु। शान्ति प्रक्रियाया सवालय् दलतय्गु दथुइ दनिगु छुं छुं मतभेदयात आन्तरिक छलफलया विषय यानाः प्रधानमन्त्री डा. बाबुराम भट्टराई भारत भ्रमण यानाः लिहां वयेवं सहमति यानाः वनेगु नापं मतभेदयात सार्वजनिक मयायेगु धकाः सहमति जूगु खँ एमालेया नेता भिम रावलं धयादीगु दु।
