२४२ म्हेसिया न्हूदँ समारोह समिति नीस्वन
येँ (झीगु स्वनिगः)
नेपाःया राष्ट्रिय संवत् नेपाल संवत् ११३२ न्हूदँ तःजिक हनेगु नितिं म्हिगः बुधवाः च्वंगु मुँज्यां मानवअधिकारवादी नेता पद्मरत्न तुलाधरया नायःसुइ २४२ म्हेसिया 'नेपाल संवत् राष्ट्रिय न्हूदँ समारोह समिति ११३२' घोषणा याःगु दु । उगु समितिइ जातीय संगठनया प्रतिनिधि, न्हूदँ समारोह समितिया पुलांपिं नायःत, संविधानसभाया आदिवासी जनजाति सभासद्त, नेवाः स्वायत्त राज्य मंकाः संघर्ष समितिइ दुथ्यानाच्वंगु ११ गू घटक, राजनीतिक दलया प्रतिनिधित नं दुथ्याकूगु दु ।
उगु भेलां थुगुसीनिसें नेपाल संवतया न्हूदँयात राष्ट्रिय स्तरय् हनेगु धकाः नं निर्णय याःगु दु । थुगुसी न्हूदँया विशेष समारोह न्हापांखुसि खुल्लामञ्चय् यायेत्यंगु दु । उगु विशेष समारोहलय् प्रधानमन्त्री डा. बाबुराम भट्टराई मूपाहां जुयादीगु नापं थीथी राजनीतिक दलया शीर्ष नेतातय्सं नं सम्वोधन यानादी धकाः नेपाल संवत् राष्ट्रिय न्हूदँ समारोह समितिया दुजःतय्सं धयादीगु दु । थ्व हे झ्वलय् समारोह समितिया नायः पद्मरत्न तुलाधरं म्हिगः बुधवाःया मिति तयाः पिथंगु प्रेस विज्ञप्तिइ नेपाःया छगू जक राष्ट्रिय संवत् नेपाल संवतया न्हूदँ खुन्हु सांस्कृतिक बाजं थानाः खुल्लामञ्चय् विशेष समारोह यायेगु जुइ धकाः न्ह्यथनातःगु दु ।
