निम्हं मन्त्रीत पदमुक्त : संसद् न्ह्यात

येँ (झीगु स्वनिगः)

प्रधानमन्त्री डा. बाबुराम भट्टराई नं रक्षामन्त्री शरदसिंह भण्डारी व भूमिसुधार मन्त्री प्रभु साहयात पदमुक्त यानागु घोषणा यानादीगु दु । छवाः न्ह्यःनिसें प्रमुख प्रतिपक्ष दल नेपाली कांग्रेस, एमाले नापं थीथी दलया सांसद्तय्सं इपिं निम्हं मन्त्रीतय्गु राजीनामा माग यानाः संसद अबरुद्ध यानाः वयाच्वंगु खःसा म्हिगः प्रधानमन्त्री डा. भट्टराई स्वयं व्यवस्थापिका संसदय् उपस्थिति जुयाः सम्वोधन यायेगु झ्वलय् उगु कथं घोषणा यानादीगु खः । सम्वोधन यायेगु झ्वलय् वय्कलं धयादिल 'निम्हं मन्त्रीतय्त चीकागु जिं राष्ट्रपति नापं सम्मानित सदनयात जानकारी बियाच्वना ।'

प्रधानमन्त्री भट्टराई नं थौं विहिवाःनिसें भारतय् भ्रमण यायेगु विषययात कयाः न्वंवायेगु झ्वलय् भारतय् दीर्घकालीन रुपं लिच्वः लाइगु कथंया छुं नं सम्झौता यायेगु जुइमखु धकाः न्ह्यथसें धयादिल 'राष्ट्रिय सहमति मजुइकं झीसं छुं नं कथंया सम्झौता भारतलिसे यायेगु जुइमखु ।' तःन्हु न्ह्यःनिसेंं अबरुद्ध जुयाच्वंगु प्रधानमन्त्री डा. बाबुराम भट्टराई नं निम्हं मन्त्रीतय्त पदमुक्ति यानागु धकाः घोषणा यानाः संसदय् हे अथे सम्वोधन यायेवं म्हिगः बुधवाःनिसें हे व्यवस्थापिका संसद सुचारु जूगु दु ।